ەكسپو كەزىندە ديماش قۇدايبەرگەننىڭ جەكە كونسەرتى وتەدى
بۇل تۋرالى ەكسپو-2017 حالىقارالىق مامانداندىرىلعان كورمەسىنىڭ مادەني ويىن- ساۋىقتىق جانە سپورتتىق ءىس- شارالارىنىڭ كەشەندى باعدارلاماسى جاريالانعان expo2017culture.kz سايتىندا حابارلاندى.
كونسەرت ەلورداداعى «سارى ارقا» رەسپۋبليكالىق ۆەلوترەگىندە 27 - ماۋسىم كۇنى كەشكى 19:00-دە باستالادى دەپ كورسەتىلگەن. كەش 2 ساعاتقا سوزىلادى دەپ جوسپارلانعان. ازىرگە بيلەتتەر ساتىلىمعا شىققان جوق.
ەستەرىڭىزگە سالا كەتەيىك، ديماش قۇدايبەرگەن بۇعان دەيىن «رىن مين رى باۋ» («حالىق گازەتى») باسىلىمىنا سۇحبات بەرىپ، قىتايلىق ازاماتتاردى استانادا وتەتىن ەكسپو كورمەسىنە شاقىرعان بولاتىن. «بيىل ماۋسىم ايىندا قازاقستاندا ەكسپو-2017 حالىقارالىق كورمەسى اشىلادى. ەكسپو كورمەسى تۇڭعىش رەت ورتالىق ازيا ەلىندە وتكىزىلەدى. بارلىقتارىڭىزدى قازاقستانعا كەلىپ، ەكسپو كورمەسىن تاماشالاۋعا، قازاقتىڭ اسەم تابيعاتىن كورۋگە، ءدامدى تاعامدارىنان اۋىز تيۋگە شاقىرامىن. ءبارى ساتىمەن بولسا، مەن اتالمىش كورمەدە ءان ايتاتىن بولامىن»، - دەگەن ەدى ءانشى.
اۆتور: ەربول جانات
