10:10, 26 - ناۋرىز 2017 | GMT +5
ديماش ءوز ءانىن قازاق جانە قىتاي تىلىندە ورىندادى
استانا. قازاقپارات - قىتايدىڭ «Singer 2017» ءان بايقاۋىنا قاتىسىپ جاتقان قازاقستاندىق ءانشى ديماش قۇدايبەرگەن ونىنشى كەزەڭدە و. بايسەڭگىردىڭ سوزىنە جازىلعان ءوز ءانى «ۇمىتىلماس كۇن» ءانىن قازاق جانە قىتاي تىلىندە ورىنداپ، ءۇشىنشى ورىننان كورىندى،
دەپ حابارلايدى قازاقپارات.
بۇعان دەيىن حابارلاعانىمىزداي، 10 كەزەڭنەن تۇراتىن بايقاۋدىڭ ىرىكتەۋ كەزەڭى ءوز مارەسىنە جەتتى. جوبانىڭ باستاپقى ءۇش ءانشىسى د. قۇدايبەرگەن، Lion جانە Sandy اقتىق سىنعا تىكەلەي جولداما الدى. ال 23 - ناۋرىز كۇنى بولىپ وتكەن «جۇباتۋ» باسەكەسىنە بايقاۋدان شىعىپ قالعان 10 ءانشى قاتىسىپ، ونىڭ تەك 7-ەۋى فينالعا شىقتى. وسىلايشا بايقاۋدىڭ ەكى كەزەڭنەن تۇراتىن اقتىق باسەكەسىنە 10 ءانشى جولداما الدى.
ايتا كەتەرلىگى، ديماش ىرىكتەۋ كەزەڭدەرىندە ءتورت رەت ءبىرىنشى ورىن الىپ، جالپى ەسەپتە كوش باستاپ تۇر. فينال 8 جانە 15- ءساۋىر كۇنى وتەتىن بولادى.
اۆتور: مۇحتار قاليموللا ۇلى
