قىزىلوردادا قويلاردى تىكۇشاقپەن قۇتقاردى - فوتو
وقيعا 19- ناۋرىز كۇنى شامامەن ساعات 10:30 دا بولعان. قارماقشى اۋدانىنا قاراستى ابىلا ەلدى مەكەنىندەگى قىستاۋدى سىرداريا وزەنىنىڭ سۋى جايىلۋى سالدارىنان سۋ الىپ كەتتى. وندا جايىلىپ جۇرگەن 449 باس ۇساق مال قالىپ قويدى، ونىڭ ىشىندە، اۋىلدىڭ 28 باس ۇساق مالى ولگەن.
قىزىلوردا وبلىسى ت ج د مەملەكەتتىك ءتىل جانە اقپارات توبىنىڭ باس مامانى ايگۇل نۇرمانوۆانىڭ مالىمەتىنشە، 10 ساعات 45 مينۋتتا سىرداريا وزەنىنە مونيتورينگ جۇمىستارىن جۇرگىزۋگە جانە ابىلا ەلدى مەكەنىندەگى مالداردى قاۋىپسىز جەرلەرگە كوشىرۋگە ەكيپاج قۇرامىندا 5 ادامى بار مي-171 تىكۇشاعى ۇشىرىلدى.
«بىزگە سۋ الىپ كەتكەنى جانە ۇساق مالدار ءولىپ جاتقانى تۋرالى حابارلاندى. ونىڭ ۇستىنە، سۋ ورتاسىندا قالىپ قويعان مال سانى دا كوپ. سوندىقتان تىكۇشاق جىبەرىلدى. 50 قويدان تيەپ، بارلىعى 402 باس قوي مەن ەشكىنى قاۋىپسىز جەرگە تاسىدى»، - دەيدى ايگۇل نۇرمانوۆا.
سونىمەن قاتار، ۇساق مالدى كوشىرۋ جۇمىسىنا بارلىعى 173 ادام، 22 بىرلىك تەحنيكا جۇمىلدىرىلدى. سونىڭ ىشىندە، 80 اۋىل تۇرعىنى دا اتسالىستى.
«توتەنشە جاعدايلار دەپارتامەنتىنىڭ قىزمەتكەرلەرىنە العىس ايتامىز. ءبىزدىڭ ەلدى مەكەن سىرداريانىڭ جاعاسىندا، قاۋىپتى ايماقتا ورنالاسقان. «سۋ الىپ كەتۋى مۇمكىن، مالداردى جايماڭىزدار» دەپ بىزگە الدىنا الا ەسكەرتىلدى.
تۇرعىندار سوعان قاراماي مالدارىن جايىلىمعا جىبەرگەن ەدى. مىنە، وسىنداي جاعداي بولدى، از-ماز شىعىنعا ۇشىرادىق. دەگەنمەن، قوي-ەشكىلەرىمىز قۇتقارىلدى»، - دەيدى اۋىل اقساقالى مۇحتار تىنىبايەۆ.
بۇدان بولەك، بەكەت توقبايەۆ دەگەن اۋىل تۇرعىنى دا اۋىل مالدارىن قۇتقارۋعا دەر كەزىندە كومەكتەسكەن ازاماتتارعا راحمەتىن جەتكىزدى.
