بەلگىسىز بىرەۋلەر «قازاق ەلى» مونۋمەنتىنىڭ باسىنا ەسىمدەرىن قاشاپ جازىپ كەتتى
جازبانى ءوشىرۋ ءۇشىن اكىمدىك الپينيستەردى تارتپاق دەپ حابارلايدى «ك ت ك» ارناسى.
بۇل سوزدەردى ناۋرىز مەيرامىن درونعا ءتۇسىرىپ، روليك جاساعان قوعام بەلسەندىسى بايقاپ قالعان. ارينە، مۇندا ولار انىق كورىنبەيدى. دەسە دە، كوزى قىراعى ازامات «قازاق ەلىنە» بەلگىسىز بىرەۋلەردىڭ مۇرات، بەردىبەك جانە تاراز دەپ جازىپ كەتكەنىن بايقاعان. بۇنى اكىمدىكتەگىلەر دە راستاپ وتىر.
ءبىراق شەنەۋنىكتەر ەلورداداعى ەڭ ۇلكەن ەسكەرتكىشتى بۇلدىرگەندەردى ىزدەپ، جازالامايدى ەكەن. ويتكەنى بۇل ۆاندالداردىڭ ەمەس، قۇرىلىسشىلاردىڭ ءىسى. ونىڭ ۇستىنە الىپ ساۋلەت ونەرىنىڭ تۋىندىسىنا ارنايى تەحنيكا بولماسا شىعۋ مۇمكىن ەمەس.
«مونۋمەنتتىڭ جوعارى جاعىنا جازبا قالدىرۋ مۇمكىن ەمەس. مەنىڭشە، ەسكەرتكىشتى ورناتىپ جاتقاندا جۇمىسشىلار ءوز ەسىمدەرىن قاشاپ جازعان. جاقىندا الپينيستەر بوياۋدىڭ قۇرامىن تەكسەرەدى. ءسويتىپ، ءوشىرۋدىڭ جولدارىن ىزدەيدى»، - دەيدى استانا قالاسى ەسكەرتكىشتەر مەن تاريحي-مادەني مۇرا نىساندارىن ساقتاۋدى قامتاماسىز ەتۋ ديرەكتسياسى ديرەكتورىنىڭ مىندەتىن اتقارۋشى نەللي شيۆرينا.
