فۋتبول: جاستارىمىز گەرمانيالىق كلۋبتان ۇتىلىپ قالدى

استانا. قازاقپارات - 21 جاسقا دەيىنگى قازاقستان ۇلتتىق قۇراماسى گەرمانيالىق «كايزەرسلاۋتەرن» كلۋبىمەن جولداستىق كەزدەسۋ وتكىزىپ، جەڭىلىپ قالدى، دەپ حابارلايدى قازاقپارات ءتىلشىسى.

ماتچ بارىسىندا ەسەپتى العاش بولىپ قازاقستان قۇراماسى اشتى. فۋتبولشىلارىمىزدان ماكسيم فەدين گول سوعىپ، ءوز كومانداسىن العا شىعاردى. وكىنىشكە قاراي، ودان كەيىن گەرمانيالىق كلۋبتىڭ جاستارى قاقپاعا 2 دوپ سالىپ، ءبىرىنشى تايمدى جەڭىسپەن اياقتادى.

ال ويىننىڭ ەكىنشى بولىگىندە قازاقستان ساپىنان ورالحان ومىرتايەۆ مەرگەندىگىمەن كوزگە ءتۇسىپ، ەسەپتى تەڭەستىرگەنىمەن، قارسىلاستارى دا قاراپ قالماي ءۇشىنشى گولىن سالىپ، جەڭىستى قولدان جۇلىپ الدى.

وسىلايشا، جەرلەستەرىمىز 3:2 ەسەبىمەن ۇتىلدى.

اۆتور: كۇنسۇلتان وتارباي