قازاقستان مەن موڭعوليا بالۋاندارى بىرگە جاتتىعۋ جاساپ جاتىر

استانا. قازاقپارات - موڭعوليا استاناسى ۇلانباتىر قالاسىندا دزيۋدوشى قىزدارىمىزدىڭ قاتىسۋىمەن حالىقارالىق وقۋ-جاتتىعۋ جيىنى ءوتىپ جاتىر، دەپ حابارلايدى فەدەراتسيانىڭ باسپا ءسوز قىزمەتى.

اتالعان مالىمەتكە سۇيەنسەك، بىرلەسكەن وقۋ-جاتتىعۋ جيىنى ناۋرىزدىڭ 18 ءى باستالعان. وعان ەلىمىزدەن بىلىكتىلىگىن شىڭداۋعا 19 دزيۋدوشى قىزىمىز قاتىسقان.

وسىدان ءبىر كۇن بۇرىن موڭعوليا دزيۋدو فەدەراتسياسى قازاق قىزدارىن ناۋرىز مەرەكەلەرىمەن قۇتتىقتاپ، سالتاناتتى تۇردە داستارحان جايدى. موڭعوليا تاراپىنان كورسەتىلگەن مۇنداي ەرەكشە ىقىلاسقا قىزدارىمىز ءوز ريزاشىلىعىن ءبىلدىرىپ، قۇرامانى باستاپ بارعان ەنحبااتار داشجامتس پەن مارات دانايبايەۆقا العىسىن ايتتى.

- ەل ىشىنەن بولەك، حالىقارالىق دارەجەدەگى وقۋ-جاتتىعۋ جيىندارى سپورتشىلاردىڭ بىلىكتىلىگىن ارتتىرىپ، شەتەلدىك سپورتشىلارمەن تاجىريبە الماسادى. بۇل ولاردى فيزيكالىق جانە تاكتيكالىق تۇرعىدا مىقتىلاي تۇسەدى، - دەيدى قىزداردان قازاقستان ۇلتتىق قۇراماسىنىڭ باپكەرى مارات دانايبايەۆ.

سونداي-اق، گۇلجان يسانوۆا: «حالىقارالىق دارەجەدەگى وقۋ-جاتتىعۋ جيىندارىنا قازاقستاندىق سپورتشىلاردىڭ قاتىستىرىلۋى فەدەراتسيا تاراپىنان اتقارىلىپ جاتقان جۇمىستىڭ جەمىسى. شەتەل سپورتشىلارىمەن تاجىريبە الماسساق، ۇلكەن تۋرنيرلاردا كومەگىن تيگىزبەي قويمايدى»، - دەيدى فەدەراتسيا باسشىلىعىنا العىسىن ءبىلدىرىپ.

ەستەرىڭىزگە سالا كەتسەك، ۇلتتىق قۇراما وسى وقۋ-جاتتىعۋ جيىنىنان كەيىن تبيليسيدە وتەتىن گران پري تۋرنيرىنە قاتىسادى.

اۆتور: كۇنسۇلتان وتارباي