عالىمدار كارىلىكتى جەڭەتىن ءدارى ويلاپ تاپتى
Cell جۋرنالىندا جاريالانعان باياندامادا كارىلىككە قارسى پرەپاراتتى قابىلداعان تىشقانداردىڭ بەلسەندىلىگى ارتىپ، ولار جۇگىرىپ وتكەن قاشىقتىق ەكى ەسەلەنگەنى ايتىلعان. سونداي-اق عالىمدار كەمىرگىشتەردىڭ ءجۇنى جىلتىراپ، كەيبىر ىشكى اعزالارىنىڭ، اسىرەسە باۋىر جۇمىسى جاقسارعانىن اڭعارىپتى.
زەرتتەۋ اۆتورلارى جاڭا پرەپارات ورگانيزمدەگى قارتايعان جاسۋشالاردى جوياتىن قابىلەتكە يە دەيدى. مۇنداي جاسۋشالار ۋاقىت وتكەن سايىن بولىنە الماي، قارتايعان ادامنىڭ اعزاسىنا جينالا بەرەدى، وسىلايشا جارانىڭ جازىلۋ پروتسەسسىن باياۋلاتىپ، قاتەرلى دەرتتەرمەن كۇرەسۋ قابىلەتىن السىرەتەدى. سونىمەن قاتار، بۇل جاسۋشالار ادام اعزاسىن كارىلىككە الىپ كەلەتىن زياندى زاتتار بولەدى ەكەن.
BBC تىلشىسىنە بەرگەن سۇحباتىندا وسى زەرتتەۋگە قاتىسقان عالىمداردىڭ ءبىرى پەتەر دە كايزەر سىناق ءبىر جىل شاماسىندا جۇرگەنىن ايتتى. وعان ادام ومىرىمەن سالىستىرعاندا 90 جاستاعى قاريامەن شامالاس تىشقاندار قاتىسقان. ولارعا اتالمىش پرەپارات اپتاسىنا ءۇش رەت ەگىلگەن.
زەرتتەۋ بارىسىندا تىشقاندارعا پرەپاراتتىڭ ەشقانداي كەرى اسەرى تيمەپتى. ەندى عالىمدار بۇل ءدارىنى ادامدارعا سىناپ كورۋدى جوسپارلاپ وتىر.
