قايعىلى تىكەلەي ەفير: تاتار قىزى ءوز ءولىمىن ۆيدەوعا ءتۇسىردى

استانا. قازاقپارات - فەيسبۋك جانە ينستاگرام جەلىلەرىنىڭ جاڭا فۋنكتسياسىنا ساي، كەز كەلگەن ادام تىكەلەي ەفيردە حالىقتىڭ قويعان سۇراعىنا جاۋاپ بەرە الادى.

الەۋمەتتىك جەلىلەردەگى سەلفيدەن كەيىنگى «جۇقپالى» ادەت وسى بولسا كەرەك.

 ءبىراق، تىكەلەي ەفيردى قاي ۋاقىتتا جانە قاي جەردە ىسكە قوسۋدىڭ قاراپايىم قاۋىپسىزدىك ەرەجەلەرىن دە ۇمىتپاعان ابزال. تىكەلەي ەفيردە كولىك جۇرگىزەمىن دەپ، اجال قۇشقان تاتار قىزىنىڭ تاعدىرى كەشەدەن بەرى الەۋمەتتىك جەلىدە كوپتى ويلاندىرا باستادى، دەپ حابارلايدى قازاقپارات.

قازان قالاسىنىڭ تۇرعىنى، جاس قىز 23 - ناۋرىز كۇنى تاڭەرتەڭ كولىك جۇرگىزىپ كەلە جاتقاندا تىكەلەي ەفيرگە شىققان. قازان قالاسىنىڭ مەملەكەتتىك جول قاۋىپسىزدىك ينسپەكتسياسىنىڭ اقپاراتىنا سۇيەنسەك، جۇرگىزۋشى قىز جولدىڭ قارسى بەتىنە شىعىپ كەتىپ، جولاۋشىلار اۆتوبۋسىنا سوقتىعىسقان.

جول اپاتى قازان- دۋبيازى تاس جولىندا ورىن العان. 22 جاستاعى ب. سيتورا ەسىمدى قىز تىكەلەي ەفيرگە شىعىپ، «سالەم. قايدا جۇرسىزدەر، نە ىستەپ جاتىرسىزدار، قايدا بارا جاتىرسىزدار؟ » دەپ اڭگىمەنى باستاعان. سول ارادا كەلگەن حاتتاردىڭ بىرىنە كوز اۋدارعان سيتورا جولدىڭ قارسى بەتىنە شىعىپ كەتكەنىن بايقاماي قالعان. رۋلگە يە بولا الماعان ول جولاۋشىلار اۆتوبۋسىنا سوقتىعىسقان. دارىگەرلەر بويجەتكەننىڭ ومىرىنە اراشا تۇسە المادى. ال، اۆتوبۋستا وتىرعان بەس جولاۋشى مەن جۇرگىزۋشى اۋرۋحاناعا ءتۇستى.