قىتاي ەشقاشان قازاق حالقىنىڭ قۇقىقتارىنا قىسىم جاسامايدى - ەلشى چجان حانحۋەي
«ارينە، قىتاي مەن قازاقستان ارسىنداعى ترانس شەكارالىق وزەندەر كوپ. سونىڭ بارلىعى - ورتاق بايلىق، قۇدايدىڭ ەكى حالىققا بەرگەن نەسىبەسى. ول - ءبىر. ەكىنشىدەن، ءبىز وسى ماسەلە بويىنشا تىعىز جۇمىس ىستەپ كەلەمىز. اشىعىن ايتايىن، ونداي ماسەلە ءبىزدىڭ بارلىق كورشىلەس ەلدەرىمىزبەن بار. الايدا تەك قازاقستانمەن عانا وزەن-سۋلاردى ءبولۋ بويىنشا كەلىسسوزدەردى باستاپ وتىرمىز. ءيا، ونى كەش باستادىق، ءبىراق بارىنەن بۇرىن ناقتى ءبىر ناتيجەگە جەتەتىن ءتۇرىمىز بار. ول كەلىسسوزدەر ءساتتى اياقتالادى دەپ بىلەمىن. ءبىز ءارقاشان قازاقستاننىڭ مۇددەسىن ەسكەرەتىن بولامىز. قىتايدىڭ باسشىلىعى ءاۋ باستا ەشقاشان قازاق حالقىنىڭ قۇقىقتارىنا قىسىم جاسامايتىنىنا ۋادە بەرگەن»، - دەدى حانحۋەي مىرزا بۇگىن استانادا وتكەن باسپا ءسوز ءماسليحاتىندا.
ونىڭ ايتۋىنشا، بۇگىندە ترانسشەكارالىق وزەن سۋلارىن ءبولۋ كەزىندە عىلىمي تۇرعىدا سول سۋدىڭ ناقتى كولەمىن ەسەپتەپ شىققان ءجون. قازىرگى جاھاندىق جىلىمىقتى دا ەسكەرۋ كەرەك. سۋدى ءبولۋدىڭ ناقتى پرينتسيپتەرىن انىقتاۋ قاجەت.
«ماسەلەن، قازاقستاندا قۇرعاقشىلىق بولعاندا ءبىز وزىمىزدەگى سۋ توعاندارىن بىردەن اشىپ تاستاپ، بارلىق سۋدى جىبەردىك. سوندا سىزدەر ءبىر عانا قوڭىراۋ جاسادىڭىز. ءبىز بولساق، بىردەن سۋ توعاندارىن بوساتتىق. مىنە، دوستىق، ءوزارا سەنىم دەپ وسىنى ايت. قازىرگى كەلىسسوزدەر دوستىق پەن ءوزارا سەنىمگە نەگىزدەلۋى كەرەك»، - دەپ اتاپ كورسەتتى ەلشى.
ايتا كەتەيىك، بۇگىنگى باسپا ءسوز ءماسليحاتىندا چجان حانحۋەي «استاناداعى ەكسپو كەزىندە قىتايلىقتارعا جاتىن ورىندار جەتىسپەۋى مۇمكىن» دەگەن ويىن جەتكىزدى.
ەلشى «قىتايلىق قاتەر» تۋرالى ميفتى جوققا شىعارۋعا تىرىستى. سونداي-اق ول قازاقستاندىق ءانشى ديماش قۇدايبەرگەننىڭ قىتايدىڭ مادەني نارىعىنداعى تاڭعاجايىپ جەتىستىگىنە قاتىستى ءوز پىكىرىن ءبىلدىردى.
اۆتور: ارمان اسقاروۆ
