الماتىدا بۇيرەك دونورىنىڭ ءولىمى بويىنشا تەرگەۋ ءجۇرىپ جاتىر

استانا. قازاقپارات - الماتىدا بۇيرەگىن دونورلىققا ۇسىنعان پاتسيەنتتىڭ وتا كەزىندە كوز جۇمۋىنا بايلانىستى قىلمىستىق ءىس قوزعالدى، دەپ حابارلايدى قازاقپارات.

 «قازىر تەرگەۋ امالدارى جۇرگىزىلۋدە. ونىڭ قورىتىندىسى بويىنشا مەديتسينا قىزمەتكەرلەرىنىڭ كىنالارى بار- جوعى ناقتى انىقتالادى. ترانسپلانتاتسيا - جوعارى تەحنولوگيالىق مەديتسينالىق كومەك ءتۇرى، ول قاتەرگە تولى. ءبىزدىڭ ستاندارت بويىنشا، دونور دا، رەتسيپيەنت تە وتا الدىندا كەلىسىمگە قول قويادى، سەبەبى ونىڭ قاۋىپى وتە زور. اتالعان وقيعادا وكىنىشكە وراي، قايعىلى جاعداي ورىن الدى. دونوردىڭ جاعدايى كۇرت ناشارلاپ كەتتى، ونىڭ ءومىرىن اراشالاپ قالۋ ءۇشىن كوپتەگەن مۇمكىندىكتەر جاسالدى، قايتا وتا جاسالدى. وسىنداي ادام شىعىنى بولعان ۋاقىتتا ساراپتاما جۇرگىزىلەدى»، - دەدى ق ر دەنساۋلىق ساقتاۋ ءمينيسترى ەلجان ءبىرتانوۆ استاناداعى №5 ەمحانانى ارالاۋ كەزىندە.

 ونىڭ سوزىنشە، تەرگەۋگە كومەك رەتىندە قاجەتتى ماماندار تارتىلاتىن بولادى. سوندىقتان مينيستر بۇنى ۇلكەن داۋعا اينالدىرماي، الدىمەن تەرگەۋ ناتيجەلەرىن كۇتۋدى ۇسىندى. «ترانسپلانتاتسيا دەگەن وتە كۇردەلى تاقىرىپ، ءبىزدىڭ ەلدە ترانسپلانتاتسيالاۋعا مۇقتاج جاندار وتە كوپ. كەي كەزدە اقشا تابۋ ماقساتىندا دونورلار رەتسيپيەنتتەرمەن كەلىسىپ جاتادى. ءبىزدىڭ مينيسترلىك ونداي كەزدەردە وتادان باس تارتادى. وسىنى زاڭدىق تۇرعىدا رەتتەۋ ءۇشىن بىزگە عانا ەمەس، قۇقىق قورعاۋ ورگاندارى دا اتسالىسۋى قاجەت»، - دەدى ول.

 ەسكە سالا كەتسەك، جەلىدە 19 - قاڭتار كۇنى الماتىنىڭ №7 اۋرۋحاناسىندا بۇيرەك دونورى كوز جۇمعاندىعى تۋرالى اقپارات تاراعان بولاتىن. ول رەتسيپيەنتكە تۋىس بولىپ كەلمەگەنى دە حابارلانعان ەدى. جاريالانىم اۆتورىنىڭ سوزىنشە، قازاقستاندا بۇيرەك دونورىنىڭ كوز جۇمۋى العاش رەت ورىن الىپ وتىر. كەيىن مينيستر ەلجان ءبىرتانوۆ ول اقپاراتتى راستادى. بۇل ىسكە قاتىستى تەرگەۋ شارالارى ءالى ءجۇرىپ جاتىر.

 اۆتور: جاسۇلان جولدىبايەۆ