جاپون گازەتىندە قازاقستانداعى ناۋرىز تۋرالى ماقالا شىقتى
دەپ حابارلايدى قازاقپارات «ەگەمەن قازاقستان» گازەتىنە سىلتەمە جاساپ.
«قازاقستاننان حات- حابار» ايدارىمەن جاريالانعان ماقالادا ورتالىق ازيا تۇرعىندارى اسىعا كۇتەتىن ناۋرىز مەرەكەسىنىڭ ءمان- ماعىناسى جانە قازاقستان رەسپۋبليكاسىندا ونىڭ قالاي تويلايتىنى جازىلعان. ماقالادا شىعىس حالىقتارى ءۇشىن اسا ماڭىزدى مەرەكە - ناۋرىز كەلگەندە ەجەلگى عۇن زامانىنداعى كوشپەندىلەر ەرتە تۇرىپ، كۇندى قارسى العاندىعى تۋرالى ايتىلادى.
«كوكتەمدى قارسى العاندا ورتالىق ازيا حالىقتارى اعاش ەگىپ، بۇلاق كوزىن اشادى» دەي كەلە اۆتور، ناۋرىزدىڭ قازاق تانىمىمەن بايلانىسىن باياندايدى. سونىمەن قاتار، ماقالادا قازىرگى زامانداعى ناۋرىز ايشىقتارىن دا سۋرەتتەگەن. مەرەكە كۇنى استانا، الماتى شاھارلارىندا ەلباسى مەن قالا باسشىلارىنىڭ قۇتتىقتاۋ سوزىمەن اشىلاتىن ناۋرىز مەيرامىنىڭ تويلانۋى تۋرالى جازىلعان.
ماقالانىڭ «تاۋ باۋرايىنداعى جامبىل اۋىلىندا» دەگەن بولىمىندە 2009 -جىلى ءبىر توپ جاپون ازاماتتارىنىڭ جەتىسۋ جەرىندەگى جامبىل اۋىلىندا قوناقتا بولىپ، اناسىنىڭ قولىنان ناۋرىز كوجەدەن ءدام تاتقانىن ەسىنە العان جۋرناليست ناۋرىز كوجە ءدامىنىڭ ەرەكشەلىگى مەن ءپىسىرۋ ادىستەرىنە توقتالادى. جۋرناليست قازاق ەلى ۇلى مەيرامعا ارنالعان ناۋرىز كوجەنى بىرلىك پەن بەرەكەنىڭ سيمۆولى سانايتىنىن، ناۋرىز كۇنى ەشكىمدى الالاماي، داستارقاننان ءار ادام ءدام تاتۋ كەرەكتىگىن ايتقان.
اۆتور: قانات مامەتقازى ۇلى
