ق ر قورعانىس ءمينيسترى وزبەكستان قورعانىس ۆەدومستۆوسىنىڭ باسشىسىمەن كەزدەستى

 استانا. قازاقپارات - استانادا ق ر قورعانىس ءمينيسترى گەنەرال- پولكوۆنيك ساكەن جاسۇزاقوۆتىڭ وزبەكستان رەسپۋبليكاسى قورعانىس ۆەدومستۆوسىنىڭ باسشىسى گەنەرال- پولكوۆنيك كابۋل بەرديەۆپەن جۇمىس كەزدەسۋى ءوتتى،

 دەپ حابارلايدى ەلىمىزدىڭ قورعانىس مينيسترلىگىنىڭ باسپا ءسوز قىزمەتى.

 وزبەكستاننىڭ قورعانىس ءمينيسترى ق ر تۇڭعىش پرەزيدەنتى - ەلباسى اتىنداعى ۇلتتىق قورعانىس ۋنيۆەرسيتەتىنە بارىپ، ۋنيۆەرسيتەتتىڭ وقۋ- ادىستەمەلىك جانە ماتەريالدىق بازاسىمەن تانىستى. ۇلتتىق قورعانىس ۋنيۆەرسيتەتى جانە وزبەكستان رەسپۋبليكاسى قارۋلى كۇشتەرىنىڭ اكادەمياسى اراسىندا ىنتىماقتاستىق تۋرالى مەموراندۋمعا قول قويىلعانىن ايتا كەتكەن ءجون. وزبەكستاننىڭ پرەزيدەنتى شاۆكات ميرزيەيەۆتىڭ قازاقستانعا مەملەكەتتىك ساپارى بارىسىندا مەملەكەت باسشىلارىمەن اسكەري ىنتىماقتاستىق تۋرالى كەلىسىمگە جانە ەكى ەلدىڭ قورعانىس ۆەدومستۆولارى اراسىنداعى اسكەري- تەحنيكالىق ىنتىماقتاستىق تۋرالى مەموراندۋمعا قول قويىلعان بولاتىن.