اقتوبەدە كوكپار ۇلتتىق ويىنى كەنجە دامىعان
قازىر بار كۇش «كوكپار» ۇلتتىق ويىنىن دامىتۋعا باعىتتالعان، دەپ حابارلايدى قازاقپارات ءتىلشىسى.
№10 ات سپورتى تۇرلەرى بويىنشا وبلىستىق بالالار جانە جاسوسپىرىمدەر مەكتەبى ناۋرىز مەرەكەسىنە وراي ورتالىق ساياباققا اعاش ءۇي تىكتى. بۇگىن قالا تۇرعىندارى مەن قوناقتارىنا ۇلتتىق سپورت تۇرلەرى بويىنشا جارىستار وتكىزىپ، ۇيىمداستىرۋ وسى مەكتەپ ۇجىمىنىڭ مىندەتىنە جۇكتەلگەن. مەكتەپتەگى سپورت شەبەرلەرى مەن شاكىرتتەر ناۋرىز مەرەكەسىنە وراي دايىندىقتى ەكى كۇن بۇرىن باستادى.
سپورت مەكتەبىندە قازىر 372 بالا بار. ولار تەڭگە ءىلۋ، اۋدارىسپاق، جامبى اتۋ، كوكپار ۇيىرمەلەرىنە قاتىسادى. سونىمەن قاتار، قازاق كۇرەسى مەن توعىزقۇمالاق ۇيىرمەلەرىنە بارادى.
«ات سپورتى تۇرلەرى بويىنشا وبلىستىق بالالار جانە جاسوسپىرىمدەر مەكتەبىنىڭ اتاۋىن ۇلتتىق سپورت دەپ وزگەرتۋ جۇمىستارى جۇرگىزىلىپ جاتىر. بۇرىن جانىمىزداعى يپپودروم جەكەنىڭ قولىندا بولدى. ونى قايتارىپ، بىزگە بەرىپ جاتىر. جابىق مانەج سالىندى، ەندى قىسى- جازى دايىندىقتى ۇزدىكسىز جۇرگىزۋگە مۇمكىندىك بار. جەتىستىكتەرىمىز دە از ەمەس. ءاليحان باشىمبايەۆ تەڭگە ىلۋدەن 7 دۇركىن ق ر چەمپيونى، ازيا بىرىنشىلىگىنىڭ كۇمىس جۇلدەگەرى. اۋدارىسپاقتان ارمان ساعىمبايەۆ، شىڭعىس ەرجانوۆ بار. ولار جاسوسپىرىمدەر اراسىندا ق ر چەمپيونى. مەكتەپتە 45 ات بار. ونىڭ 12- ءسى كوكپارعا ارنايى بولىنگەن»، - دەيدى №10 ات سپورتى تۇرلەرى بويىنشا وبلىستىق بالالار جانە جاسوسپىرىمدەر سپورت مەكتەبىنىڭ ديرەكتورى باقتيار تولەۋوۆ.
بالالار ءارتۇرلى. ولاردىڭ ءبىرى ۇيىرمەگە جازىلىپ، كەيىن كەتىپ قالادى. باسىم بولىگى اتتان الىس ۇزاماي، جاتتىعۋلارعا ۇزبەي قاتىسادى. تالاپ بويىنشا مەكتەپ شاكىرتتەردى قىركۇيەك ايىندا جيناپ، تاربيەلەيدى. جىل ورتاسىندا قوسىلۋعا مۇمكىندىك جوق. ءارى بارلىق ۇيىرمەلەر تولىق، كەزەك كۇتىپ جۇرگەن بالالار دا بار.
«ات سپورتى مەكتەبىنە كەلگەن بالا الدىمەن اتقا ءمىنىپ ۇيرەنەدى. كەيىن كوكپارشىلار، اۋدارىسپاقشىلار دەپ بولەك، يكەمىنە قاراي كاسىبي جاتتىقتىرامىز. ءبىر قۋانتارلىعى، شاكىرتتەرىمىز بايگە اتتارىندا شاۋىپ ءجۇر»، - دەدى ب. تولەۋوۆ.
سپورت مەكتەبىندەگى اتتاردىڭ بارلىعى - تازا قاندى جىلقىلار. كەيبىرى رەسەيدەن اكەلىنگەن. ەرەكشەلىگى، بايگەگە ەمەس، كوكپار تارتۋعا باسىمدىق بەرىلدى.
«اتتاردىڭ بارلىعى الىندى، جەتكىلىكتى. ءبىز بايگەگە قاتىستىرمايمىز. ۇلتتىق سپورتتى كوتەرۋ ماقساتىندا كوكپار، اۋىرىسپاق، تەڭگە ءىلۋ، جامبى اتۋعا شىعارامىز. كوكپاردىڭ اتى بولەك. وعان بالا مىنۋگە بولمايدى. جارىستارعا دايىنداپ، سەمىرتىپ، جىلىك مايىن تولتىرىپ، بابى كەلگەننەن كەيىن عانا قوسامىز. ماسەلەن، 40 كۇن جىلىك مايىن جيناۋ ءۇشىن تۇراتىن بولسا، ءارى قاراي 100, 500 مەتر جۇرگىزىپ، دايىندايدى. سودان كەيىن كوكپارعا قوسامىز. ءبىر وكىنىشتىسى، وڭىردە كوكپار سپورتى كەنجە دامىپ كەلە جاتىر. وڭتۇستىك وڭىردە جاقسى دامىعان. ول جاقتا توي، ۇلكەن اس بولاتىن بولسا، كوكپار ىلەدى. بىزدە بايگە جارىس وتەدى. قالتالى ازاماتتاردىڭ ءبارى بايگە اتىن ۇستايدى»، - دەدى ب. تولەۋوۆ.
ونىڭ ايتۋىنشا، ەلىمىزدىڭ وڭتۇستىگىندە 1 مىڭ جىگىتتەن 100 جىگىت، 100 جىگىتتەن 10 جىگىت ىرىكتەلەدى ەكەن. تاڭداۋ بار، مىقتىلار توپ جارادى. ال اقتوبەدە ىرىكتەۋ وتپەيدى. ءبارى سپورت مەكتەبىنىڭ شاكىرتتەرى، ۇستازدارى.
«ءبىزدىڭ وڭىردە مەكتەپتەن كىم شىعادى، سول قاتىسادى. ىرىكتەۋ جوق. كوكپاردان تۇڭعىش سپورت شەبەرىمىز نۇرلان دوداي بار. قازىر شاكىرتتەر جاتتىقتىرۋشى قىزمەتىن اتقارىپ ءجۇر. شىڭعىس ەرجانوۆ، ارمان ساعىمبايەۆ ۇلتتىق سپورتتى دامىتۋعا ۇلەس قوسىپ كەلەدى»، - دەدى مەكتەپ ديرەكتورى.
سپورت مەكتەبىنە قىزدار دا بارادى. بۇرىن قىز قۋۋ ءوتىپ تۇراتىن. كەيىن تازا قاندى اتتار جارىسقا ءتۇسىپ، قىزداردىڭ قاۋىپسىزدىگى ەسكەرىلدى. قىز قۋۋ سپورت تۇرىنەن الىنىپ، جامبى اتۋ ەنگىزىلدى. دەگەنمەن، بۇل شەكتەۋ قىزداردىڭ قىزىعۋشىلىعىن تومەندەتپەدى. اسىرەسە، ورىس ۇلتىنىڭ قىزدارى جانۋارعا جاقىن. ولار تاڭەرتەڭ كەلىپ، كەشكە دەيىن ات كۇتىمىن جاساۋعا شەبەر.
«ۇلتتىق سپورت تۇرلەرى دەگەندە اسىق اتۋدى قوسادى. جارىستارعا شىعارامىز. ءبىراق ەرەجەسى مينيسترلىكتە بەكىتىلمەگەندىكتەن سپورت شەبەرىنە ۇمىتكەر، سپورت شەبەرى دەگەن اتاق بەرىلمەيدى. قازىر نەگىزگى كۇشتى كوكپارعا سالدىق. اتىراۋ، ماڭعىستاۋدا ۇلكەن دەڭگەيدە دامىپ جاتىر. ولار ەرەسەكتەر اراسىندا ۇزدىك ۇشتىككە كىرەدى. وزدەرى كلۋب اشقان، قىمبات اتتاردى كلۋب قارجىسىنا العان. سونىمەن قاتار، وڭتۇستىكتەن لەگيونەر شاقىرىلعان. ولارعا 100-150 مىڭ تەڭگە جالاقى بەرەدى. بىزدە ونداي مۇمكىندىك جوق. ءبىر مەكتەپ، ەشقانداي باسەكەلەستىك بايقالمايدى. ماسەلەن، كۇرەستەن ىرىكتەلەدى، مىقتىلار انىقتالادى. بىزدەر تەك ءوز بالالارىمىزدى اپارامىز. سوڭعى كەزدە قوبدا، تالدىساي، ەڭبەكشى دەگەن اۋىلدار كوكپار وتكىزىپ جاتىر. جەكە ات الىپ، سىيلىق تىگىپ، جارىس وتكىزەدى. بالالاردى تاجىريبە جيناسىن دەپ جىبەرەمىز»، - دەدى ب. تولەۋوۆ.
سپورت مەكتەبى مۇمكىندىگى شەكتەۋلى بالالارعا ارناپ يپپوتەراپيا ەمىن جاسايدى. ارنايى ءتورت ادام وقىتىلىپ، ولار جىل سايىن جۇزدەن استام بالانىڭ دەنساۋلىعىن نىعايتۋ ءۇشىن جۇمىس ىستەپ ءجۇر.
سپورت مەكتەبىنىڭ شاكىرتتەرى مەن وقىتۋشىلارىن الدا ۇلكەن جارىستار كۇتىپ تۇر. بيىل قىركۇيەك ايىندا اقتوبەدە «اقبيداي» وتەدى. ازىرلىك باستالدى. سونىمەن قاتار، «ەكسپو-2017» كورمەسىنە وراي كوكپاردان الەم چەمپيوناتى وتەدى. تەڭگە ىلۋدەن ازيا بىرىنشىلىگى ۇيىمداستىرىلادى. اقتوبەلىك سپورتشىلار وسى جارىستاردىڭ بارلىعىنا قاتىسىپ، باق سىنايدى.
اۆتور: التىناي ساعىندىقوۆا
