نازاربايەۆ پەن ميرزيەيەۆ شەكارا ارالىق وزەندەردى ءتيىمدى پايدالانۋعا ۋاعدالاستى
بۇل تۋرالى بۇگىن اقوردادا ەلىمىزگە العاشقى مەملەكەتتىك ساپارمەن كەلگەن وزبەكستان پرەزيدەنتى شاۆكات ميرزيەيەۆپەن كەلىسسوزدەردەن كەيىنگى بىرلەسكەن مالىمدەمە بارىسىندا ەلباسى نۇرسۇلتان نازاربايەۆ ايتتى، دەپ حابارلايدى قازاقپارات.
«كەلىسسوزدەر بارىسىندا ءبىز سۋ- ەنەرگەتيكا كەشەنى ماسەلەلەرىنە ايرىقشا نازار اۋداردىق. ورتالىق ازيانىڭ شەكارا ارالىق سۋ رەسۋرستارى ورتاق قۇندىلىق بولىپ سانالاتىندىعىن تاعى ءبىر مارتە قۋاتتادىق جانە ءبىز باۋىرلاس كورشىلەرىمىزدىڭ سۋدى پايدالانۋ نيەتتەرىنە تولىقتاي تۇسىنىستىكپەن قارايمىز. ءبىز وعان قاتىسۋعا دايىنبىز. ءبىراق، اتالعان وزەندەردىڭ تومەنگى ساعاسىنداعى بارلىق ەلدەرگە نۇقسان كەلمەۋى ءتيىس»، - دەدى قازاقستان پرەزيدەنتى. مەملەكەت باسشىسىنىڭ اتاپ وتۋىنشە، اتالعان شەكارا ارالىق سۋلاردى اقىلعا سالىپ پايدالانۋ ونداعان، ميلليونداعان تاعدىرلارعا، ورتالىق ازيا وڭىرىندەگى تۇراقتىلىق پەن ءال- اۋقاتقا قاتىسى بار.
«ءبىز ارال تەڭىزى توڭىرەگىندەگى احۋالدى دا تالقىلاپ، كەزەكتى مارتە ارال تەڭىزىن قۇتقارۋ حالىقارالىق قورى بۇل پروبلەمانى شەشەتىن جانە ءبىزدىڭ ەلدەرىمىزدى بايلانىستىراتىن نەگىزگى پلاتفورما دەگەن ورتاق پىكىرگە كەلدىك»، - دەدى ەلباسى.
اۆتور: مارلان جيەمباي
