وزبەكستاننىڭ جاڭا پرەزيدەنتى ساۋدا ءۇشىن بارلىق مۇمكىنشىلىكتەردى اشتى - ەلباسى
بۇل تۋرالى بۇگىن اقوردادا ەلىمىزگە العاشقى مەملەكەتتىك ساپارمەن كەلگەن وزبەكستان پرەزيدەنتى شاۆكات ميرزيەيەۆپەن بولعان كەلىسسوزدەردەن كەيىنگى بىرلەسكەن مالىمدەمە بارىسىندا ەلباسى نۇرسۇلتان نازاربايەۆ ايتتى، دەپ حابارلايدى قازاقپارات.
«بۇگىنگى كۇنى استانا مەن تاشكەنت ورتالىق ازيا وڭىرلەرىن تولىقتاي العاندا ەكىجاقتى ساۋدا- ەكونوميكالىق ارىپتەستىكتە جەتەكشى پوزيتسياعا يە بولىپ وتىر. وتكەن جىلدىڭ قورىتىندىسىندا ءبىزدىڭ ەلدەرىمىزدىڭ اراسىنداعى تاۋار اينالىمىنىڭ كولەمى شامامەن 2 ميلليارد دوللاردى قۇرادى. ال ساۋدانىڭ ناقتى كولەمدەگى ءوسىمى 16 پايىزعا ارتتى. سوڭعى ۋاقىتتا ءبىزدىڭ بايلانىستارىمىز مۇلدەم باسقاشا دامي باستاعاندىعىن اتاپ وتكەن ورىندى»، - دەدى نۇرسۇلتان نازاربايەۆ.
ەلباسىنىڭ ايتۋىنشا، سوڭعى 5 ايدا قازاقستان مەن وزبەكستان اراسىنداعى تاۋار اينالىمى ەكى تاراپتا دا 30 پايىزعا ءوسىم كورسەتكەن. 4 ساۋدا ءۇيى اشىلىپ، قازاقستاننىڭ استىعى كورشى ەلگە 30 پايىز ارتىق جەتكىزىلسە، ەلىمىزگە كەلىپ جاتقان وزبەك جەمىس- جيدەگى مەن كوكونىسىنىڭ كولەمى 25 پروتسەنتكە ارتقان.
«بۇل وزبەكستاننىڭ جاڭا باسشىسىنىڭ ساۋدا ءۇشىن بارلىق مۇمكىنشىلىكتەردى تولىقتاي اشىپ، كەدەرگىلەردى جويۋىنىڭ ارقاسىندا ورىن الدى. شارۋاشىلىقارالىق قارىم- قاتىناستار دا بەلسەندى دامۋدا. قازاقستان ەكونوميكاسىنىڭ ءارتۇرلى سالالارىندا وزبەك كاپيتالى سالىنعان 800-دەن استام كاسىپورىن جۇمىس ىستەۋدە»، - دەدى ق ر پرەزيدەنتى.
اۆتور: مارلان جيەمباي
