قازاقستاندى ەڭ جاقىن ءارى سەنىمدى كورشى رەتىندە قاراستىرامىز - وزبەكستان پرەزيدەنتى
دەپ حابارلايدى قازاقپارات.
«نۇرسۇلتان ءابىش ۇلى! وتكەن جىلى سامارقاندقا كەلگەنىڭىزدە قازاقستان ءار ۋاقىتتا دا وزبەكستانمەن بىرگە بولاتىنىن ايتقان ەدىڭىز. جاقسى كۇندەردە بىرگە قۋانىپ، قيىندىق تۋعان ساتتەردە ءبىر بىرىمىزگە سۇيەۋ بولامىز، دەدىڭىز. ءسىزدىڭ وتكەن جىلى سامارقاندتا ايتقان وسى سوزدەرىڭىز ءبىزدى ودان ارى جاقىنداتا ءتۇستى. ءسىزدىڭ وسى سوزدەرىڭىز تىرەۋ بولدى، بۇكىل وزبەك حالقى ناعىز دوستىڭ ءارى باۋىردىڭ قامقورلىعىن سەزىندى»، - دەدى وزبەكستان پرەزيدەنتى ەلباسى نۇرسۇلتان نازاربايەۆقا قاراتا ايتقان سوزىندە.
شاۆكات ميرزيەيەۆ سوڭعى 5 ايدىڭ ىشىندە ەكى ەلدىڭ اراسىنداعى بايلانىستار تىڭ سەرپىن الىپ، جاڭا باعىتتا ءوربي باستاعاندىعىن باسا ايتتى.
«ساۋدا- ەكونوميكالىق قارىم- قاتىناس مۇلدەم جاڭا دەڭگەيگە كوتەرىلدى. بۇگىنگى بيزنەس فورۋمعا وزبەكستاننىڭ 250 كاسىپكەرى قاتىسادى. 1 ميلليارد دوللاردىڭ كەلىسىمشارتىنا قول قويىلادى»، - دەدى ول.
وزبەكستان باسشىسىنىڭ ايتۋىنشا، وسىناۋ قىسقا عانا مەرزىمنىڭ ىشىندە وڭىرلىك ىنتىماقتاستىققا باسا نازار اۋدارىلدى. قازاقستاننىڭ 3 ءوڭىرىنىڭ باسشىسى وزبەكستاندا بولسا، وزبەك ەلىنىڭ كوپتەگەن ايماعىنىڭ باسشىلارى قازاق ەلىندە بولىپ قايتتى.
«سىزدەر، تۇڭعىش پرەزيدەنت يسلام كارىموۆپەن بىرگە وسىناۋ كوپىردى قالادىڭىزدار. بۇل كوپىر الداعى ۋاقىتتا نىعايا بەرەتىن بولادى. ءبىز ءار ۋاقىتتا دا قازاقستاندى ەڭ جاقىن ءارى سەنىمدى كورشى رەتىندە قاراستىرامىز»، - دەدى وزبەك باسشىسى.
«سىزدەن ءجيى كەزدەسىپ، ساعاتتارىمىزدى تۇزەتىپ، العا قاراي ىلگەرىلەيمىز دەپ ۋاعدالاستىق. نۇرسۇلتان ءابىش ۇلى، مەن سىزگە وزىڭىزگە ىڭعايلى كەز كەلگەن ۋاقىتتا وزبەكستانعا شاقىرامىن. سىزبەن وزبەكستاندا كەزدەسۋگە وتە قۋانىشتى بولامىن»، - دەدى ميرزيەيەۆ.
اۆتور: مارلان جيەمباي
