مۇحامەدي ۇلى مەن تۇيمەبايەۆ حالىقتىڭ اراسىندا بيلەپ ءجۇر

 استانا. قازاقپارات - كيەلى تۇركىستاندا تويلانعان ناۋرىز مەرەكەسىنىڭ درونمەن تۇسىرگەن ۆيدەوسى جەلىگە جۇكتەلدى.

«تۇركىستان - تۇركى الەمىنىڭ مادەني استاناسى» جىلىنىڭ اياسىندا تويلانعان بيىلعى ناۋرىز قازاقستاندىقتاردىڭ ەرەكشە ىقىلاسىنا يە بولدى، دەپ حابارلايدى قازاقپارات.

ۆيدەونى وڭتۇستىك قازاقستان وبلىسىنىڭ اكىمدىگى جۇكتەگەن. روليكتەن كورىپ وتىرعانىمىزداي، تۇركىستانداعى ناۋرىزدا مادەنيەت جانە اقپارات ءمينيسترى ارىستانبەك مۇحامەدي ۇلى مەن وبلىس اكىمى جانسەيىت تۇيمەبايەۆ حالىقپەن بىرگە ءبي بيلەپ، ءان سالىپ ءجۇر.

ەستەرىڭىزگە سالا كەتەيىك، 21- ناۋرىز كۇنى وبلىس اكىمى جانسەيىت تۇيمەبايەۆ «تۇركىستان - تۇركى الەمىنىڭ مادەني استاناسى» شاراسىن سالتاناتتى تۇردە اشىپ بەرىپ، ناۋرىز مەرەكەسىنە ارنالعان تۇركى الەمىنىڭ «ناۋرىزناماسىنا» قاتىسقان بولاتىن.

جالپى، كيەلى تۇركىستان تورىندەگى ءدۇبىرلى شاراعا 23 مەملەكەتتەن كەلگەن 300 گە تارتا شەتەلدىك قوناقتار، حالىقارالىق ۇيىم وكىلدەرى، قازاقستاندىق زيالى قاۋىم جانە ونەر تۇلعالارى، بۇقارالىق اقپارات قۇرالدارى مەن وڭتۇستىكقازاقستاندىق تۇرعىندار، ياعني، جالپى سانى 10 مىڭعا جۋىق ادام قاتىستى.

ولاردىڭ ىشىندە، ق ر مادەنيەت جانە سپورت ءمينيسترى ارىستانبەك مۇحامەدي ۇلى مەن «تۇركسوي» حالىقارالىق ۇيىمىنىڭ باس حاتشىسى دۇيسەن قاسەيىنوۆ جانە ءار ەلدىڭ جوعارى لاۋازىمدى رەسمي وكىلدەرى بار.

اۆتور: كەنجەكەي توقتامۇرات قىزى