دەليدە ەكى مىڭنان استام ادام ناۋرىز مەرەكەسىن تويلادى
مەرەكەلىك شارانى ءۇندىستانداعى ەلشىلىكتەر ۇيىمداستىردى، ونىڭ قاتارىندا قازاقستان ەلشىلىگى دە بار. ونى انشىلەر، ءبيى جانە ساز انسامبلدەرى ونەر كورسەتەتىن ءداستۇرلى جارمەڭكە رەتىندە وتكىزدى، سونداي-اق ۇيىمداستىرۋشى ەلدەردىڭ ۇلتتىق تاعامدارى قويىلعان داستارحاندار جايىلدى.
ءۇندىستاندا ناۋرىز ءۇشىنشى مارتە كەڭىنەن اتالىپ وتۋدە. بيىلعى كوكتەم مەرەكەسىن اتاپ وتۋگە كەلگەن قالا تۇرعىندارى مەن قوناقتارىنىڭ سانى بۇرىنعىدان كوپ بولدى. كەلۋشىلەردىڭ دەنى ناۋرىز ءۇندى حالقىنا ەتەنە تانىس ءارى جاقىن بولىپ بارا جاتقانىن اتاپ ءوتتى.
مادەني باعدارلاما اياسىندا قازاقستان Global Air تۋريستىك كومپانياسى قولداۋىمەن ەلشىلىك كەلۋىن ۇيىمداستىرعان مۋزىكالىق-ءبي ءانسامبلى ونەر كورسەتتى.
دەلي تۇرعىندارى قازاق حالقىنىڭ سازى، ءانى جانە بيلەرىن جاقسى قابىلدادى. كومەي سازىن ورىنداپ، شاڭقوبىزدا ويناعان انار قاسىموۆا، قوبىز شەرتكەن داريعا قادىروۆا، سونداي-اق حالىق ءبيىن بيلەگەن الماتىلىق A'DIVA ءبي ۇجىمىنىڭ ونەرى كوپشىلىكتىڭ كوڭىلىنەن شىقتى.
قوناقتار قازاقستاندىق ديپلوماتتاردىڭ ازىرلەگەن ۇلتتىق اس ءمازىرى ناۋرىز كوجە، قۋىرداق، باۋىرساق، ىرىمشىك، جەنت، قۇرتتان اۋىز ءتيدى، قازاق شەبەرلەرىنىڭ قولىنان شىققان كادەسىي، كارتينا جانە ۇلتتىق كيىمدەردى تاماشالادى.
