اراب شەيحتارى مۇعالىمگە ميلليون دوللار سىيلادى
مەگگي ماكدوننەل «ءوز وقۋشىلارىن جاقسى ومىرگە قاراي بەيىمدەپ، قوعامنىڭ ءبىلىمىن ارتتىرعانى ءۇشىن» ماراپاتتالدى.
سوڭعى التى جىلدا ول كۆەبەك پروۆينتسياسىنداعى سالليۋي ەلدى مەكەنىندە سولتۇستىك امەريكانى مەكەندەيتىن ينۋيتتەر حالقىنا ءتالىم بەرگەن. مۇعالىمدى تانىستىرعان مالىمەتتەر بويىنشا بۇل ولكەدە ءوزىن-ءوزى ءولتىرۋ كورسەتكىشى ءورشىپ تۇرعان ەكەن. ماكدوننەلدىڭ سوزىنشە، ول ءوزى ون شاقتى سۋيتسيدكە ءوز كوزىمەن كۋا بولىپتى.
«مەن سىنىپقا كىرگەن كەزدە ءبىر پارتا بوس تۇرادى، بالالار دۇعا جاساپ وتىرادى. بۇكىل الەمنىڭ بۇل پروبلەماعا نازار اۋدارعانىنا راحمەت ايتامىن»، - دەدى مەگكي ماكدوننەل.
ەرتە جۇكتىلىك پەن سەكسۋالدى زورلىق ءورشىپ تۇرعان ورتادا ول جەرگىلىكتى قىزداردى ومىرلىك قاعيدالارعا ۇيرەتەتىن باعدارلاما قۇراستىرادى. كوپتەگەن مۇعالىمدەر جۇمىس ورنىنداعى قيىنشىلىقتىڭ كەسىرىنەن ءوز قىزمەتتەرىن تاستاپ كەتكەن. ال ماكدوننەل بولسا ولاردان باس تارتپاي، كەرىسىنشە ولاردىڭ اتا-اناسىنا اينالادى. كونكۋرستاعى جەڭىسىمەن كانادانىڭ پرەمەر-ءمينيسترى دجاستين تريۋدو بەينەۇندەۋ جولداپ قۇتتىقتادى.
كونكۋرسقا 179 ەلدەن 20000 مۇعالىم قاتىسقان. ال فينالدا تەك سولاردىڭ 10 ى عانا قالعان.
بۇل اتاۋلى سىيلىق ءۇش جىل بۇرىن الەم نازارىنا ۇسىنىلعان ەدى. ونى Varkey Foundation كوممەرتسيالىق ەمەس ۇيىمى قولدايدى. باس وفيسى دۋباي قالاسىندا ورنالاسقان.
