ەڭ سىمباتتى پرەمەر-مينيستر ناۋرىز مەرەكەسىمەن قۇتتىقتادى

استانا. قازاقپارات - كانادانىڭ پرەمەر-ءمينيسترى، الەمدەگى ەڭ سىمباتتى ساياساتكەردىڭ ءبىرى اتاعىن يەمدەنگەن دجاستين تريۋدو كانادالىقتاردى ناۋرىز مەرەكەسىمەن قۇتتىقتادى، دەپ حابارلايدى قازاقپارات.

ساياساتتا دا، الەۋمەتتىك جەلىدە دە وتە بەلسەندى تريۋدو ارنايى ۆيدەو ءتۇسىرىپ، ناۋرىز مەرەكەسىنىڭ تاريحىنا توقتالعان.

«جەكە ءوز اتىمنان جانە ايەلىم سوفيدىڭ اتىنان بارلىق كانادالىقتاردى ناۋرىز مەرەكەسىمەن قۇتتىقتايمىن. پارسى كۇنتىزبەسى بويىنشا بۇل جاڭا جىلدىڭ باستاۋى. بۇل كۇنى تۇگەل وتباسى مەن دوس-جاراندار جينالىپ، ءبىر-بىرىنە سىيلىق جاسايدى، ءدامدى تاماق ءىشىپ، مۋزىكا تىڭدايدى. بيىل كانادا 150 جىلدىعىن تويلاماق. سوندىقتان، ءبىز ەلىمىزدەگى كوپ مادەنيەتتى، كوپ ءتىل مەن سەنىم-ءداستۇردى تويلاۋ ءۇشىن كەز كەلگەن مۇمكىندىكتى پايدالاناۋىمىز كەرەك. بۇل جان-جاقتىلىق ءبىزدىڭ ەلىمىزدى نىعايتىپ، بايىتا تۇسەدى. ناۋرىز قۇتتى بولسىن»، - دەدى كانادا پرەمەرى ءوزىنىڭ قۇتتىقتاۋىندا.

ايتا كەتەيىك، دجاستين تريۋدو - كانادانىڭ تاريحىنداعى ەكىنشى ەڭ جاس پرەمەر-مينيستر. 2015-جىلى پارلامەنتتىك سايلاۋدا تريۋدو باسقاراتىن ليبەرالدى پارتيا جەڭىسكە جەتىپ، ول 4- قاراشا كۇنى كانادانىڭ پرەمەر-ءمينيسترى بولىپ تاعايىندالدى. دجاستين تريۋدو - كانادانىڭ ون بەسىنشى پرەمەر-ءمينيسترى پەر تريۋدونىڭ ۇلكەن ۇلى.