پرەزيدەنت بارشا قازاقستاندىقتاردى ءاز ناۋرىز مەرەكەسىمەن قۇتتىقتادى - فوتو
«بارشاڭىزدى ۇلىستىڭ ۇلى كۇنى - ءاز ناۋرىز مەرەكەسىمەن شىن جۇرەگىممەن قۇتتىقتايمىن! بۇگىن قازاقستاننىڭ ءار وڭىرىندە وسى مەرەكەنى تويلاپ جاتقان حالقىمىز بار. بۇل - بابالارىمىزدىڭ باعزى زاماننان بەرى تويلاپ، بىزگە قالدىرعان اماناتى، بەرەكە-بىرلىكتىڭ، ىزگىلىكتىڭ جولى بولسىن دەگەن تىلەۋى، جاقسىلىق پەن كەلىسىمنىڭ جاڭا كۇننىڭ سيمۆولى.
وسى كەزدەن باستاپ، كۇن ۇزارىپ، ءتۇن قىسقارىپ، جارىق ساۋلەسى جەرگە ءتۇسىپ، كوكتەمنىڭ باسى بولىپ سانالادى. ناۋرىزدا حالقىمىز جينالىپ، بۇلاقتاردىڭ كوزىن اشىپ، جاسىل-جەلەك وتىرعىزىپ، بولاشاققا كوز تىگەتىن بولعان. ناۋرىز كوجە جاساپ، اعايىن-تۋىس، كورشى ءبىر-بىرىمەن قاتىناسىپ، ءدام تاتىپ، بولعاندى ەستەرىنە ءتۇسىرىپ، رەنجىگەندەر ءبىر-بىرىنەن كەشىرىم سۇراپ، كورىسىپ، قاۋىشىپ، ءبىر-بىرىنە سۇيىسپەنشىلىگىن كورسەتەتىن بولعان.
رۋحاني تىلەۋدىڭ اقجارما مەيرامى بولىپ سانالاتىن. بۇل عاجايىپ شاقتا اسپاننان التىن كۇننەن نۇر توگىلىپ، جەرگە التىن ءدان سەبىلەتىنىن بىلەسىزدەر. ەل-جۇرتتىڭ كوڭىلىندە جاڭا ءۇمىت پايدا بولىپ، ەرتەڭگى كۇنگە سەنىم نىعايادى. سول سەبەپتەن حالقىمىز ناۋرىزدى «ۇلىستىڭ ۇلى كۇنى» دەپ اتاعان.
شىنىن ايتقاندا، ناۋرىز قازاقتىڭ جاڭا جىلى بولىپ ەسەپتەلۋى كەرەك. مىڭجىلدىقتاردان بەرى وزگەرمەي كەلە جاتقان وسى زاڭدىلىق، بيىل سول داستۇرىنەن جاڭىلعان جوق. بۇل مەرەكە ۇلت پەن ءدىندى تالعامايدى. ورتاق مەيرام بارلىق حالىققا. بۇل ءبىزدىڭ مىزعىماس بىرلىگىمىز بەن ىرىستى ىنتىماعىمىزدى كورسەتەدى. جاراتىلىس اتاۋلى جاڭعىرىپ، وسى كەرەمەت كۇندە جاقسى تىلەكتە بولايىق، اعايىن!»، - دەدى ەلباسى مەرەكەلىك كونسەرت كەزىندە.
ەلباسى، سونىمەن قاتار، ءسوز بارىسىندا اتا-بابالارىمىزدىڭ قاعيدالارىن ورىنداي وتىرىپ، بىرلىك پەن بەرەكەدەن جاڭىلماعان حالىق ەكەنىمىزدى ەسكە سالدى.
«سونىڭ ارقاسىندا تاۋەلسىزدىگىمىزدى تىكتەپ، كەشە بارلىق جەتىستىكتەرىمىزدى ايتتىق. عاسىرعا تاتيتىن 25 جىل ىشىندە كۇرەس پەن قۋانىشقا تولى جىلداردا حالقىمىزدىڭ ەڭسەسىن كوتەرىپ، قازاقتىڭ تۇعىرىن جوعارى ۇستاپ كەلە جاتىرمىز»، - دەدى مەملەكەت باسشىسى.
سونداي-اق، پرەزيدەنت «جاڭعىرۋ 3.0» باعدارلاماسى مەن كونستيتۋتسيالىق رەفورمالارعا توقتالىپ ءوتتى.
«وسى جاقىندا ءبىز «ءۇشىنشى جاڭعىرۋ» دەگەن جاڭا باعدارلاما جاريالاپ، حالىقتىڭ بولاشاقتاعى تۇرمىسىن جاقسارتۋدىڭ جولىن ايتتىق. ونىڭ ۇستىنە كونستيتۋتسياعا ەنگىزىلەتىن وزگەرىستەر ەلدىڭ بولاشاعىنىڭ تۇراقتىلىعى ءۇشىن جاسالعان ءبىزدىڭ بولاشاققا دەگەن ءۇمىتىمىز بولىپ سانالادى.
كيەلى تاۋەلسىزدىگىمىزدەن باستاۋ الاتىن بارشا قۇندىلىقتارىمىزدى بەكەمدەي تۇستىك. ەلدىگىمىز تارازىعا سالىنعان وسىناۋ زاماندا سوعىستان بەرى ۇستاپ كەلە جاتقان بەرەكە-بىرلىگىمىزدى ەش ۋاقىتتا جوعالتپايىق. بىرگە ۇستايىق. ەلىمىز جاڭا بەلەسكە كوتەرىلۋى ءۇشىن، ءۇشىنشى جاڭعىرۋدى ورىنداۋ ءۇشىن بارلىعىمىز ءبىر ادامداي جۇمىس ىستەۋىمىز كەرەك. وسى جولدا ءبارىمىز تىلەۋ تىلەيىك»، - دەپ ءتۇيدى ءسوزىن پرەزيدەنت.
اۆتور: جاسۇلان جولدىبايەۆ
