پاۆلوداردا ناۋرىز ارۋى بايقاۋىنىڭ باس جۇلدەسىن باياناۋىلدىق بويجەتكەن جەڭىپ الدى - فوتو
وبلىستىق مادەنيەت، ارحيۆتەر جانە قۇجاتتاما باسقارماسىنىڭ قولداۋىمەن وتكەن بايقاۋعا دوداعا ءوڭىردىڭ ءار اۋدانىنان 15 ارۋ قاتىستى. ولاردىڭ ءبىلىم دەڭگەيى مەن تالانتى تورەشىلەر تالقىسىنا ءتۇستى. بايقاۋدا ارۋلار اتا- سالتتى بەرىك ۇستاعاندىعىن، ءتول تاريح پەن مادەنيەتكە جەتىك ەكەندىكتەرىن اڭعارتتى.
بايقاۋ شارتى «مەن قازاقتىڭ قىزىمىن»، «حالقىن سۇيگەن-سالتىن سۇيەر»، «ۇلتتىق تاعام ءمازىرى»، «ونەر سارقىلماس قازىنا»، «شەبەردىڭ قولى التىن» اتتى بەس كەزەڭنەن تۇردى.
مۇندا ەلىنىڭ نامىسىن ارقالاي كەلگەن ءار ارۋ ءان مەن جىردان شاشۋ شاشىپ، ءبىرى مىڭ بۇرالا بيلەپ، بار ونەرىن حالىققا پاش ەتە وتىرا جينالعانداردىڭ قوشەمەتىنە بولەندى.
ال، قازىلار القاسى ولاردىڭ تاپقىرلىعى مەن ونەرىن ساراپقا سالا وتىرىپ، ۇزدىكتەرىن تاڭدادى. ناتيجەسىندە باياناۋىل اۋدانىنىڭ نامىسىن ارقالاي كەلگەن ارۋ ءمادينا اسىلبەكوۆا باس جۇلدەگە يە بولدى.
ال، 1-ورىنعا اقسۋ اۋىلدىق ايماعىنان كەلگەن اڭسارىم قۇرمان، 2-ورىنعا پاۆلودار قالاسىنان قاتىسۋشى گاۋحار مۇسا، 3-ورىنعا مايقايىڭ كەنتىنىڭ ارۋى گاككۋ قايرات لايىق دەپ تانىلدى.
سونداي-اق، قاتىسۋشىلارعا ارنايى نوميناتسيالار دا تابىستالدى. اتاپ وتەر بولساق، «ونەرپاز ارۋ» - اينامكوز مۇستافا، «قولاڭ شاشتى ارۋ» - دينارا قايىربەكوۆا، «شەبەر ارۋ» - اردانا قايمولدينا، «كەربەز ارۋ» - ءامينا الدامۇراتوۆا اتاندى.
