تۇركيا رەسەيدىڭ قىرىمدى اننەكسيالاۋىن ايىپتادى

استانا. قازاقپارات - تۇركيا سىرتقى ىستەر مينيسترلىگى رەسەي قىرىمدى زاڭسىز اننەكسيالاپ الدى دەپ مالىمدەپ، ۋكراينا تەرريتورياسىنىڭ تۇتاستىعىن قۇرمەتتەۋگە شاقىردى.

رەسەيدىڭ قىرىمدى اننەكسيالاعانىنا ءۇش جىل تولعان شاقتا تۇركيا سىرتقى ىستەر مينيسترلىگى سايتىندا جاريالانعان حابارلامادا انكارانىڭ تۇبەكتەگى قىرىم تاتارلارىنىڭ قۇقىقتارى مەن مۇددەلەرىن قورعاۋدى جالعاستىرا بەرەتىنى ايتىلعان.

رەسەي قىرىمدى 2014 -جىلعى ناۋرىزدا اننەكسيالاپ العان. الەمنىڭ كوپتەگەن ەلدەرى جانە ب ۇ ۇ رەسەي بۇل ارەكەتىن زاڭسىز دەپ سانايدى. تۇركيا دا قىرىمدى رەسەيدىڭ بولىگى دەپ تانۋدان باس تارتقان. قاڭتار ايىندا تۇركيا سىرتقى ىستەر ءمينيسترى ميەۆليۋت چاۆۋشوگلۋ انكارا بۇل ماسەلەگە بايلانىستى ۇستانىمىن، ءتىپتى رەسەيمەن ىنتىماقتاستىقتى قايتا قالپىنا كەلتىرگەنىنە قاراماستان، ەش وزگەرتپەيدى دەپ مالىمدەگەن.

 ناۋرىزدىڭ ورتاسىندا رەسەي پرەزيدەنتى ۆلاديمير پۋتين مەن تۇركيا پرەزيدەنتى رەجەپ ەردوعان ماسكەۋدە كەلىسسوز وتكىزگەن. ەكى ەل باسشىلارى ءوزارا ىنتىماقتاستىق پەن بىرلەسكەن جوبالاردى تالقىلاعان.

«ازاتتىق» جاڭالىقتارى