بريتانيالىقتار قازاقتىڭ ۇلتتىق تاعامدارىن دايارلاۋدى ۇيرەنىپ ءجۇر
دەپ حابارلايدى حابار 24 تەلەارناسى.
ⅩⅨ عاسىردا ەۋروپالىقتاردىڭ ىشىنەن ءبىرىنشى بولىپ قازاقستاندى زەرتتەگەن بريتانيالىق ساياحاتشىلار توماس جانە ليۋسي اتكينسونداردىڭ ۇرپاقتارى اتا- باباسىنىڭ ىزىمەن وتكەن جىلى الماتى وبلىسىنا ساياحاتتادى. بۇل ساپاردا ولار جەرگىلىكتى حالىقتىڭ قوناقجايلىعىنا جانە ۇلتتىق اس مازىرىنە ءتانتى بولعان ەكەن. بريتانياعا ورالعان سوڭ قازاق تاعامدارىن ساعىنعانىمەن، دۇكەننەن باۋىرساق ىزدەپ تابا الماعان. قازاق ستۋدەنتتەرىنىڭ شەبەرلىك ساباقتارىنان كەيىن ولار تەك باۋىرساق قانا ەمەس، ىستىق تاعامدار دا دايىنداپ ۇيرەندى.
«مەنىڭشە، قازاقتىڭ ۇلتتىق تاعامدارىن ءپىسىرۋ وڭاي، ءدامى ءتىل ۇيىرەدى. قاراپايىم دايىندالاتىن اس مۇنداي ءتاتتى بولادى دەپ كىم ويلاعان؟!»، - دەيدى پەداگوگ دجيل براۋن.
قازاقستانداعى ەستەن كەتپەس ساياحاتتان كەيىن بريتانيالىقتار دوستارى مەن تۋىسقاندارىن جيناپ ۇلى دالا ەلى تۋرالى، ونىڭ مادەنيەتى مەن داستۇرلەرى جايلى جايىپ سالادى. تانىستىرىلىمدارىنان سوڭ جاقىندارىنىڭ دا قازاقتىڭ ۇلتتىق اس- مازىرىنە دەگەن قىزىعۋشىلىعى ويانادى.
«بۇرىن- سوڭدى جىلقىنىڭ ەتىن جەپ كورمەگەن بريتانيالىقتار قازىنىڭ ءدامىن ۇناتىپ قالدى. كەيبىرەۋلەرى ۇيىندە جىلقى باعىپ وتىرعانىمەن، سوعىمعا ازىرگە جىبەرۋگە دايىن ەمەس. ويتكەنى ءۇي جانۋارلارى ولار ءۇشىن وتباسىلارىنىڭ قۇرامداس بولىگى»، - دەيدى نەسيە مەنەدجەرى ليز براۋن
بريتانيالىقتار كەيبىر قازاق تاعامدارىن وتە قۇنارلى سانايدى. ءبىراق قازاقستانعا كەلگەندە تولىق ادامداردى كوپتەپ كەزدەستىرمەگەندەرىنە اڭ- تاڭ. اعىلشىندار مۇنى جىلقى ەتىنىڭ قۇرامىندا اعزاعا كۇش- قۋات بەرىپ، سەمىزدىككە اپارمايتىن سينك پەن پروتەيننىڭ كوپتىگىمەن ءتۇسىندىرىپ وتىر. ناعىز قازاقتار سياقتى اس ازىرلەپ ۇيرەنسە دە، ولارعا كەيبىر سوزدەردى ايتۋ وڭايعا سوقپايتىن سىڭايلى. بۇل كۇنى جاس بۋىن وكىلدەرى دە ۇلتتىق تاعامدارعا دەگەن قىزىعۋشىلىق تانىتتى. اسىرەسە، ولار ۇلىستىڭ ۇلى كۇنى دايىندالاتىن ناۋرىز كوجەنى ۇناتىپ قالدى.
ادەتتە ۇنەمدى كەلەتىن اعىلشىن داستارحانى بۇگىن ەرەكشە جايناپ كەتتى. داستارحاندا باۋىرساق پەن شەلپەك، ناۋرىزكوجە مەن قۋىرداق، ءتىپتى ەت تاماق تا بار.
بريتانيالىقتاردىڭ قازاق داستۇرلەرىن مەڭگەرىپ العاندارى سونشالىق، كەتەردە قوناقتارعا سارقىتتان سالىپ بەرۋدى دە ۇمىتقان جوق. اعىلشىندار كەلەر ناۋرىز مەرەكەسىندە دە تاڭ قالدىرۋعا دايىن. ولار قازاق تاعامدارىن دايىنداپ قانا قويماي، كيىز ءۇي قۇرىپ، ۇلتتىق ويىندار ۇيىمداستىرۋدى جوسپارلاپ وتىر.
