ديپلومدى قولدان جاساتقان استانالىق شەنەۋنىك ۇياتقا قالدى

استانا. قازاقپارات - «ب» كورپۋسىنا كىرەتىن مەملەكەتتىك قىزمەتكەرلەر دە سىناقتان ءسۇرىندى.

ەمتيحان كەزىندە مىڭنان استام شەنەۋنىكتىڭ ءبىرازى لاۋازىمىنا لايىق ەمەس دەپ تانىلعان. بىلىكتىلىگىن دالەلدەي الماعانداردىڭ كوبى قوستانايلىق شەندىلەر بولىپ شىقتى دەپ حابارلايدى «ك ت ك».

جوعارى اتتەستاتسيالىق كوميسسيا 1139 شەنەۋنىكتەن سىناق العان ەكەن. ولار پرەزيدەنت اكىمشىلىگى، سەنات، ءماجىلىس اپپاراتى قىزمەتكەرلەرى، مينيسترلىك، كوميتەت، وبلىستىق دەپارتامەنت پەن باسقارما باسشىلارى. بۇلاردىڭ ىشىنەن 973 اتقامىنەر بىلىكتىلىگىن دالەلدەپ شىققان. ونىڭ 130 ىنىڭ ەندى قىزمەتى وسەدى.

ال سىنان سۇرىنگەن 36 ادامنىڭ قىزمەتى تومەندەتىلمەك. لاۋازىمىنا ساي ەمەس دەپ تانىلعانداردىڭ كوبى ينۆەستيتسيالار جانە دامۋ مينيسترلىگى مەن قوستاناي وبلىستىق اكىمدىگىندە ىستەيدى ەكەن. سونىمەن قاتار اتتەستاتسيا كەزىندە جالعان قۇجاتپەن جۇمىس ىستەپ كەلگەن ەكى شەنەۋنىك انىقتالدى.

ونىڭ ءبىرى استانا قالاسىنىڭ جولاۋشىلار كولىگى جانە اۆتوموبيل جولدارى باسقارماسىنىڭ باسشىسى، ەكىنشىسى ماڭعىستاۋداعى باسقارما جەتەكشىسى. ەندى ولاردىڭ لاۋازىمى تومەندەتىلەدى.

«استانالىق شەنەۋنىكتىڭ مەملەكەتتىك تەستتەن وتكەنى تۋرالى سەرتيفيكاتى جالعان. ال كەلەسى قىزمەتكەر جوعارعى ءبىلىم العانى جايىنداعى ەكىنشى ديپلومىن قولدان جاساتقان»، - دەيدى مەملەكەتتىك قىزمەت ىستەرى جانە جەمقورلىققا قارسى اگەنتتىك ءتوراعاسىنىڭ ورىنباسارى ايگۇل شايموۆا.