مۇحامەدي ۇلى - گولوۆكينگە: ءبىز سەنىڭ جەڭىسىڭمەن ماقتانامىز

استانا. قازاقپارات - ق ر مادەنيەت جانە سپورت ءمينيسترى ارىستانبەك مۇحامەدي ۇلى گەننادي گولوۆكيندى امەريكالىق دەنيەل دجەيكوبسپەن جەكپە-جەكتەگى كەزەكتى جارقىن جەڭىسىمەن قۇتتىقتادى.

بۇل تۋرالى «قازاقپارات» ح ا ا ءتىلشىسى مينيسترلىكتىڭ باسپا ءسوز قىزمەتىنە سىلتەمە جاساپ حابارلايدى.

«قىمباتتى گەننادي گەنناديەۆيچ! سەنى بۇگىنگى جەڭىسىڭمەن جانە ءوز اتاقتارىڭدى تابىستى قورعاۋىڭمەن قۇتتىقتايمىن! كۇشتى ءارى لايىقتى قارسىلاسىڭمەن ادال تارتىستا قايتپاس قايسارلىعىڭدى، ءور رۋحىڭدى جانە تاماشا دايىندىعىڭدى كورسەتتىڭ. كوشباسشى ەكەنىڭدى كەزەكتى رەت دالەلدەپ، حالىقارالىق دەڭگەيدە قازاقستان يميدجىن كوتەردىڭ»، - دەلىنگەن بوكسشىعا جىبەرىلگەن ءمينيستردىڭ جەدەلحاتىندا.

بۇل جەڭىس كوكتەمگى ناۋرىز مەرەكەسى قارساڭىندا بوكس سۇيەر قاۋىمعا جانە قازاقستاندىق جانكۇيەرلەرگە وتە جاقسى سىيلىق بولدى، دەپ اتاپ ءوتتى مۇحامەدي ۇلى.