15:17, 19 - ناۋرىز 2017 | GMT +5
الماتىدا ا ق ش- تىڭ باس كونسۋلى ناۋرىزبەن قۇتتىقتاۋ شاراسىنداعى بيگە قاتىستى
الماتى. قازاقپارات - الماتى قالاسىنداعى ا ق ش- تىڭ باس كونسۋلدىعى قالا تۇرعىندارى مەن قوناقتارىن ناۋرىز مەرەكەسىمەن قۇتتىقتادى، دەپ حابارلايدى قازاقپارات ءتىلشىسى.
ا ق ش باس كونسۋلدىعىنىڭ قۇتتىقتاۋى بەينەتۇسىرىلىم ارقىلى بەرىلگەن. وندا قۇتتىقتاۋ قالاداعى ساۋدا ورتالىقتارىنىڭ بىرىندە داستارحان باسىندا وتىرعان قازاق پەن امەريكالىقتىڭ اڭگىمەسىنەن باستالادى.
ا ق ش ازاماتى: «ناۋرىز كەزىندە نە بولادى؟»، دەپ سۇرايدى.
وعان وتانداسىمىز: «ناۋرىز رۋحىمەن ءتۇرلى عاجايىپتار بولۋى مۇمكىن» دەپ جاۋاپ بەرەدى.
سول ساتتە ءان ويناپ، ساۋدا ورتالىعىنداعى ادامدار بيلەي باستايدى.
بيشىلەر قازاقتىڭ «قاماجاي» ءبيىن بيلەيدى. بۇل قۇتتىقتاۋ باس كونسۋلدىقتىڭ Facebook الەۋمەتتىك جەلىسىندەگى پاراقشاسىندا جاريالانعان.
«ۇلىستىڭ ۇلى كۇنى ناۋرىز مەيرامىمەن قۇتتىقتايمىز! سىزدەرگە قازاق حالقىنىڭ ءبيىن تارتۋ ەتەمىز! بارلىق كەلگەندەرگە العىسىمىزدى بىلدىرەمىز!!!»، دەپ جازىلدى الەۋمەتتىك جەلىدەگى باس كونسۋلدىقتىڭ جەكە پاراقشاسىندا.
