رومان گونسالەس چەمپيوندىق اتاعىنان ايىرىلدى
وسى ۋاقىتقا دەيىن بىردە-ءبىر رەت جەڭىلمەگەن گونسالەس العاشقى راۋندتاردا ۇتىلاتىنداي بولىپ كورىنگەن ەدى.
سەبەبى تاي بوكسشىسى سريساكەت سور رۋنگۆيسايدىڭ (41-4-1, 38 ك و) جويقىن سوققىلارى دىتتەگەن جەرىنە جەتتى، ءتىپتى وڭ قولمەن جىبەرگەن ءبىر حۋكى چەمپيوننىڭ بۇيىرىنە ءتيىپ، نوكداۋنعا ءتۇسىردى.
ال ءۇشىنشى راۋندتا گونسالەس باسىنان جاراقات الدى. دەگەنمەن، نيكاراگۋالىق بوكسشى بىرتە-بىرتە جەكپە-جەكتى ءوز قولىنا الدى. ءوز شابۋىلدارىن ۇدەتىپ، قارسىلاستىڭ مىسىن باستى. وسى كەزدە رۋنگۆيساي قۋلىققا باستى.
باسپەن چەمپيوننىڭ جاراقاتىنان ۇرىپ، تەحنيكالىق نوكاۋتقا جەتكىزۋگە تىرىستى. الايدا كاسىبىي تورەشى ونىڭ ءبارىن بايقاپ تۇردى. ءبىر-ەكى رەت ەسكەرتۋ جاساعاننان كەيىن رۋنگۆيسايدىڭ ءبىر ۇپايىن شەگەردى.
سوعان قاراماستان، العان سوققىلاردان گونسالەستىڭ جاراقاتى قاناي بەردى، تاي بوكسشىسىنىڭ بەتىنە دە، دەنەسىنە دە شاشىرادى. سوڭعى راۋندتاردا ەكى بوكسشى دا جىلدامدىقتارىن ۇدەتتى. ەكەۋىنىڭ دە دايىندىقتارى جوعارى ەكەنى بايقالدى. الايدا رومان گونسالەستىڭ كەيبىر سوققىلارى اۋا قارماپ قالدى.
باسىنان دا، قاباعىنان دا سورعالاعان قان كەدەرگى جاسادى. ال تاي بوكسشىسى ەركىن قيمىلداپ، ۇپايدى ەسەلەۋگە كۇش سالدى. جەكپە-جەكتىڭ سوڭىندا ونىڭ دا قاباعى جارىلدى. تورەشىلەردىڭ شەشىمى بويىنشا تاي بوكشىسى ۇپاي سانىمەن ۇتىپ، اسا جەڭىل سالماقتاعى WBC چەمپيونى اتاندى.
ايتا كەتەيىك، ءدال وسى جەكپە-جەكتەن كەيىن ورتا سالماقتا WBA Super ، IBO، WBC جانە IBF نۇسقالارى بويىنشا الەم چەمپيونى گەننادي=ي گولوۆكين (36-0, 33 ك و) مەن WBA (Regular) بەلبەۋىنىڭ يەگەرى دەنيەل دجەيكوبس (32-1, 29 ك و) جۇدىرىقتاسادى.
اۆتور: ارمان اسقاروۆ
