ق ر ۇلتتىق مۋزەيىندە «ناۋرىز-جاڭعىرۋ نىشانى» اتتى مەرەكەلىك شارا ءوتتى
مەرەكەلىك شارا بارىسىندا ەلوردا تۇرعىندارى مەن قوناقتارىنا ىزگىلىك پەن بەيبىتشىلىك مەرەكەسى - ناۋرىزعا بايلانىستى قازاق حالقىنىڭ سالت-داستۇرلەرى كورسەتىلدى.
قازاقتىڭ اسىق اتۋ، ارقان تارتۋ، قول كۇرەسى سىندى ۇلتتىق ويىندارى ويناتىلىپ، ناۋرىز كادەسى جاسالىپ، اقىندار ايتىسى ءوتتى.
سونىمەن قاتار، استانا قالالىق مامانداندىرىلعان بالالار ءۇيىنىڭ بۇلدىرشىندەرى ءۇشىن تۇساۋكەسەر ءراسىمى ۇيىمداستىرىلىپ، ەجەلگى تۇركى قارۋ-جاراقتارى، ەتنومانەردەگى ۇيلەنۋ تويى كيىمدەرىنىڭ جانە كيىزدەن دايىندالعان كيىمدەردىڭ دەفيلەسى كورسەتىلدى.
سونداي-اق، كيىز ءۇيدىڭ قۇرىلىسى مەن جابدىقتارى تۋرالى لەكتسيا، كيىزدەن ويىنشىق جاساۋ، كەنەپكە سۋرەت سالۋ، ساندىك ينتەرەر جانە ويۋ-ورنەك، داننەن پاننو جاساۋ، كەراميكالىق بۇيىمدار ازىرلەۋ بويىنشا شەبەرلىك-سىنىپتارى ءوتتى.
استانا قالاسىنداعى ولگا كريۋكوۆانىڭ ديزاين جانە ءسان مەكتەبىنىڭ ستيليستەرى مەن يميدج شەبەرلەرى ۇسىنعان ارنايى شەبەرلىك-سىنىپتارى دا مۋزەيگە كەلۋشىلەردىڭ قىزىعۋشىلىقتارىن تۋعىزدى.
«ناۋرىز - جاڭارۋ نىشانى» اتتى شارا تاڭەرتەڭگى 10:00 دە باستالىپ، سوڭى «مۋزەيدەگى ءتۇن» اكسياسىمەن جالعاستى.
اتالمىش جوبا رەسمي تۇردە ۇلتتىق مۋزەيدىڭ ۇلكەن ءماجىلىس زالىنداعى قازاقستان حالقى اسسامبلەياسىنىڭ «ءبىر شاڭىراق استىندا» اتتى كونسەرتىمەن باستالدى. بۇل كەشتە قازاقستان حالقى اسسامبلەياسى ءتوراعاسىنىڭ ورىنباسارى دارحان مىڭباي:
«ناۋرىز - تەك تۇركىنىڭ نەمەسە جالپى ادامزاتتىڭ عانا ەمەس، بىلە- بىلگەنگە تابيعاتتىڭ دا تويى. ال، تابيعات گارمونيالىق قۇبىلىس. ءبىزدىڭ ءوز ىشكى الەمىمىز بەن قوعامىمىزدا تابيعاتقا ءتان گارمونيا بولعاندا عانا بۇل توي ءوز دارەجەسىندە اتالىپ ءوتتى دەپ ايتا الامىز. ال، قازىرگى قازاق قوعامىنداعى بەيبىتشىلىك، ەلىمىزدەگى تۇراقتىلىق پەن حالىقتار دوستىعىنىڭ قانداي دارەجەدە ەكەنى وزدەرىڭىزگە ايان. سوندىقتان، مەن ناۋرىز تويى ءبىزدىڭ دالامىزدا تابيعاتتىڭ وزىمەن بىردەي تويلانادى دەپ ويلايمىن»، - دەدى.
«مۋزەيدەگى ءتۇن» اكسياسىندا مەكتەپ جاسىنداعى وقۋشىلار مەن ستۋدەنتتەرگە ارناپ «ارحەولوگيالىق كۆەست» ويىنى جانە «جاس ارحەولوگ» اتتى عىلىمي شوۋ باعدارلاما ۇيىمداستىرىلدى.
شەبەرلەر اۋىلىندا زەرگەرلىك بۇيىمداردىڭ، اعاشتان، تەرىدەن جاسالعان بۇيىمداردىڭ، سول سياقتى كادەسىيلار مەن كىتاپتاردىڭ جارمەڭكەسى ۇيىمداستىرىلدى.
ايتا كەتۋ كەرەك، 2015-جىلى وتكەن «مۋزەيدەگى ءتۇن» شاراسىنا 23 مىڭ ادام قاتىسسا، 2016-جىلى كەلۋشىلەردىڭ سانى 30 مىڭنان استى. بيىلعى جىلى دا حالىقتىڭ بۇل اكسياعا دەگەن قىزىعۋشىلىقتارى جوعارى. وسى سەبەپتەن بۇدان بىلاي ۇلتتىق مۋزەي اتالعان اكسيانى جىلىنا 4 مارتە ۇيىمداستىرۋدى جوسپارلاپ وتىر.
