12:57, 19 - ناۋرىز 2017 | GMT +5
تۇركيادا الەمدەگى ەڭ ۇزىن اسپالى كوپىردىڭ ىرگەتاسى قالاندى
استانا. قازاقپارات - تۇركيادا الەمدەگى ەڭ ۇزىن «چاناككالە 1915» كوپىرىنىڭ ىرگەتاسى قالاندى.
بۇل تۋرالى En son haber حابارلايدى. لاپسەكي پروۆينتسياسىندا سالتاناتتى تۇردە وتكەن شاراعا ەلدىڭ پرەمەر-ءمينيسترى بينالي يىلدىرىم قاتىستى.
كەيىن تىكەلەي تەلەكوپىرگە شىققان ەل پرەزيدەنتى رەجەپ تايىپ ەردوعان ءسوز الدى. اتالعان كوپىردى تۇركيا مەن جاپونيانىڭ قۇرىلىس فيرمالارى سالادى.
ىرگەسى قالانعان «چاناككالە 1915» كوپىرى تۇركيا رەسپۋبليكاسىنىڭ 100 جىلدىعى تويلاناتىن 2023-جىلى پايدالانۋعا بەرىلەدى. سونداي-اق الەمدەگى ەڭ ۇزىن اسپالى كوپىر اتانىپ، جاپونيانى باسىپ وزادى.
جاڭا كوپىردىڭ جالپى ۇزىندىعى 4023 مەتر بولۋى جوسپارلانىپ وتىر، دەپ حابارلايدى حابار 24. ايتا كەتەيىك، قازىر الەمدەگى ەڭ ۇزىن اسپالى كوپىر جاپونيادا «اكاشي- كايكە» كوپىرى ەكەنى بەلگىلى. ونىڭ جالپى ۇزىندىعى - 3911 مەتر.
