باتىس قازاقستاندىق سۋديالار مانتيالارىن ۇلتتىق كيىمگە اۋىستىردى
ب ق و سوتىنىڭ باسپا ءسوز قىزمەتىنەن تۇسكەن مالىمەتكە قاراعاندا، قازاقتىڭ جانە باسقا ۇلت پەن ۇلىستىڭ كيىمىن كيىپ، قىزىلدى- جاسىلدى جاسانعان بارشا سوت قىزمەتكەرلەرى مەيرامدى وبلىستىق سوت عيماراتىنىڭ دالىزىندە جاساقتالعان قازاقستان حالىقتارىنىڭ ۇلتتىق سالت- داستۇرلەرى مەن قولونەر بۇيىمدارىنىڭ جانە اس مازىرلەرىنىڭ كورمەسىن تاماشالاۋدان باستادى.
مەرەكەلىك شارالار سوتتىڭ اكت زالىندا ناۋرىز مەرەكەسىنە ارنالعان سالتاناتتى جينالىسقا ۇلاستى. وندا وبلىستىق سوت ءتوراعاسى بەك امەتوۆ سوت قىزمەتكەرلەرىنىڭ رۋحىن كوتەرىپ، ەرەكشە كوڭىل- كۇيمەن باستالعان ناۋرىز مەرەكەسىنەن جاقسى اسەر العانىن جەتكىزدى. ۇلىستىڭ ۇلى كۇنى ەلىمىزدە ءتۇرلى ۇلتتاردىڭ سالت- داستۇرلەرىمەن جاراسىم تاۋىپ، جىلدان- جىلعا تۇرلەنە، بايي تۇسكەنىن اتاپ كورسەتتى.
«بۇگىن مەن سالا قىزمەتكەرلەرىنىڭ بويلارىنان ايرىقشا سەرپىلىس، كۇش- جىگەر مەن قۇلشىنىس، اسىرەسە، جاستاردىڭ كوزدەرىنەن وت كوردىم. مەرەكەلىك شارالار جوعارى دەڭگەيدە ءوتىپ جاتىر. جىل باسى - ناۋرىز مەرەكەسى بارشاڭىزعا جاقسىلىق، وتباستارىڭىزعا اماندىق، قۇت- بەرەكە اكەلسىن!»، دەدى ب. امەتوۆ.
«جاڭارۋدىڭ، ىنتىماقتاستىق پەن بىرلىكتىڭ مەرەكەسى كوپ ەتنوستى جانە كوپ كونفەسسيالى قازاقستاندىقتار ءۇشىن ەرەكشە. جىل وتكەن سايىن ناۋرىز مەيرامى ەلىمىزدى مەكەندەگەن بۇكىل حالىقتىڭ، ۇلت پەن ۇلىستىڭ ساعىنىپ كۇتەتىن ورتاق مەرەكەسىنە اينالىپ، جاڭا مازمۇنمەن، جاراسىمدى ءسان- سالتاناتىمەن تۇرلەنە تۇسۋدە. ۇلتتىق قۇندىلىقتارىمىز باعالانىپ، ەگەمەندىگىمىزدىڭ ەڭسەسىن كوتەرگەن، حالىقتىڭ تۇتاستىعى مەن دوستىعىنا ۇيىتقى بولعان ۇلىق مەرەكە - ناۋرىز مەيرامى قۇتتى بولسىن!»، دەدى قازاقستان رەسپۋبليكاسى سۋديالار وداعى وبلىستىق فيليالى ءتوراعاسىنىڭ مىندەتىن اتقارۋشى، وبلىستىق سوت سۋدياسى نيازبەك دىلدابەكوۆ.
مەرەكەلىك شارالار سوت قىزمەتكەرلەرىنىڭ كونسەرتىمەن قورىتىندىلاندى. كونسەرتتە قازاق، ورىس، ۋكراين، وزبەك، شەشەن- ينگۋش جانە باسقا ۇلتتار مەن ۇلىستاردىڭ اندەرى شىرقالىپ، بيلەرى بيلەندى.
اۆتور: ەلجان ەرالى
