استانانىڭ جاڭا تەمىر جول ۆوكزالىنىڭ ءوزى عانا ادامدى تاڭعالدىرادى - تاڭىربەرگەن بەردىوڭعاروۆ

استانا. قازاقپارات - بۇرىنعى ءماجىلىس دەپۋتاتى تاڭىربەرگەن بەردىوڭعاروۆ ءوزىنىڭ بلوگىندا استانانىڭ جاڭا تەمىر جول ۆوكزالى قۇرىلىسى بارىسى بەينەلەنگەن ۆيدەونى جاريا ەتتى، دەپ حابارلايدى قازاقپارات.

 «ءدال قازىرگى ۋاقىتتا بۇل ۆوكزالدىڭ اۋقىمى شىن مانىندە ادامدى تاڭ قالدىرادى. مەنىڭشە، بۇل استاناداعى ەڭ اۋقىمدى عيماراتتاردىڭ ءبىرى سياقتى. جوسپاردا 120 مىڭ شارشى مەتر اۋماق سالۋ كوزدەلگەن جانە بۇل نىسان 2017 -جىلدىڭ مامىر ايىندا پايدالانۋعا بەرىلمەك. بۇگىنگى كۇنى ۆوكزال قۇرىلىسىنا 1400 ادام تارتىلعان. ونىڭ 95 پايىزى قازاقستان رەسپۋبليكاسىنىڭ ازاماتتارى. ال قالعان 5 پايىزى تۇرىكتەر. ولار تۇرىكتىڭ سيمبول قۇرىلىس كومپانياسىنىڭ ماماندارى»، - دەدى ول.

سونىمەن قاتار بەردىوڭعاروۆ 7 قاباتتى ۆوكزال عيماراتىنىڭ ءىشىن دە كورسەتەدى. ۆوكزالدىڭ جابىق عيماراتىنا ءبىر مەزگىلدە 6 پويىز قاتارىنان كىرە الادى. تاۋلىگىنە 35 مىڭعا جۋىق جولاۋشىعا قىزمەت كورسەتۋگە قاۋقارلى عيمارات 26 جەدەل ساتىمەن، 52 ەسكالاتورمەن جابدىقتالعان.

 «قازاقستانعا تەمىر جول قاتىناسىمەن كەلگەن تۋريستەر ءدال وسى جەردەن ءتۇسىپ، ۆوكزالعا تاڭعالادى. اۆتوموبيلگە، باعدار اۆتوبۋستارىنا نەمەسە جەڭىل رەلستى كولىككە وتىرىپ ەكسپو- عا قاراي نەمەسە قالانى كورۋگە باعىت الادى. شىنىمدى ايتسام، ەگەر مەن تۋريست بولسام، تەك وسى تەمىر جول ۆوكزالىن كورگەننەن كەيىن- اق كەرى پويىزعا وتىرىپ، ەلىمە قايتار ەدىم. ويتكەنى، تەمىر جول ۆوكزالىنىڭ ءوزى عانا ادامدى تاڭعالدىرادى»، - دەدى تاڭىربەرگەن بەردىوڭعاروۆ.