وزبەكستان پرەزيدەنتىنىڭ قازاقستانعا ساپارىنىڭ ماقساتى بەلگىلى - ساياساتتانۋشى
وسى ساپارعا بايلانىستى بۇگىندە ساياساتتانۋشىلار وزدەرىنىڭ ءتۇرلى پىكىرلەرى مەن بولجامدارىن ايتۋدا. مامانداردىڭ پايىمىنشا، وزبەكستاننىڭ جاڭا باسشىسى ورتالىق ازيا مەملەكەتتەرىمەن قارىم- قاتىناستى نىعايتۋعا ايرىقشا مۇددەلىلىك تانىتۋدا.
«قازاقپارات» حاا تىلشىسىنە بەرگەن سۇحباتىندا قازاقستاندىق ساياساتتانۋشى ەرلان سايروۆ وسى ساپارعا بايلانىستى ءوز پىكىرىن ءبىلدىردى.
«دۇنيەجۇزىندەگى ەكونوميكالىق دامۋدىڭ ترەندتەرى وزگەرىپ جاتىر، بۇرىنعى ءتارىزدى شيكىزات ونىمدەرىمەن دامۋ ەندى مۇمكىن ەمەس. سوندىقتان قازاقستانعا ءوز ەكونوميكاسىندا ەكسپورتتىق الەۋەتتى ءارتاراپتاندىرۋدىڭ جولدارىن ىزدەۋ كەرەك. سونىمەن بىرگە ءاربىر مەملەكەتتە ءوزىنىڭ ەكونوميكالىق دامۋى ءۇشىن جۇپتاس- سەرىكتەسى دەگەن بولادى. بىزگە قازىرگى تاڭدا وسىنداي ۇلكەن سەرىكتەس قاجەت. مەنىڭ ويىمشا، بۇنداي قارىم- قاتىناستا وزبەكستان بولۋى ىقتيمال»، - دەپ توقتالدى ساياساتتانۋشى.
ونىڭ سوزىنە قاراعاندا، 25 جىلدىڭ ىشىندە اتالعان كورشىلەس ەل كونسەرۆاتيۆتىك- ەكونوميكالىق ساياسات جۇرگىزدى. وزبەكستاندا ءىرى جانە ورتا كاسىپورىنداردى جەكەشەلەندىرۋ بولۋى مۇمكىن، ياعني مەملەكەت ەكونوميكالىق تۇرعىدا اشىق ساياساتىن جۇرگىزۋى ىقتيمال.
«قازاقستاننىڭ بيزنەسمەندەرى ءۇشىن وزبەكستان جۇمىس ىستەۋگە جاڭا كەڭىستىك بولادى. سونىمەن بىرگە وسى كورشىلەس ەلدىڭ قازاقستانعا ەكسپورتتىق الەۋەتى بار ەكەنى بەلگىلى، ونىڭ ىشىندە جەمىس- جيدەك، كوكونىس جانە باسقا دا ونىمدەر جەتكىزىلەدى. ەكىنشىدەن، بۇل ەلدە اۆتوموبيل ءوندىرىسى دە دامىعان. اتاپ ايتقاندا، وزبەكستان پرەزيدەنتىنىڭ استاناعا ساپارىنان ەكونوميكالىق ينتەگراتسيانىڭ نىشاندارى پايدا بولادى دەگەن ويدامىن. ءبىراق بۇل جەردە ءبىر كىلتيپان بار. وزبەك حالقى ەجەلدەن ساۋداعا بەيىم ەكەنى بەلگىلى. 25 جىل بويى وزبەكستاندا جابىق ەكونوميكالىق ساياسات جۇرگىزگەننىڭ وزىندە دۇنيەجۇزىندە وزبەك ميللياردەرلەردىڭ سانى ارتىپ كەلەدى. سوندىقتان بۇل ەل بيزنەسى قازاقستاندا كەڭىنەن تارالۋى مۇمكىن»، - دەدى ە. سايروۆ.
ونىڭ پايىمىنشا، ەلىمىزدەگى كەيبىر ونەركاسىپ ورىندارى مەن باسقا دا ينفراقۇرىلىمدار وزبەكستاندىق كاسىپكەرلەردىڭ قىزىعۋشىلىعىن تۋدىرادى.
«ەكىنشى جاعىنان الىپ قاراساق، قازاقستانعا قوسىمشا ينۆەستيتسيا كەلەدى. مەنىڭشە، ەكى ەلدىڭ اراسىندا ساۋدا- ساتتىق، گۋمانيتارلىق سالادا تىڭ سەرپىن بولۋى ىقتيمال. باۋىرلاس ەل رەتىندەگى مادەني قاتىناستاردىڭ بارلىعى قايتادان قالپىنا كەلسە، بۇل ءوز كەزەگىندە قوس مەملەكەتكە دە دامۋدىڭ جاڭا باعىتىن اشادى»، - دەدى ول.
ەرلان سايروۆتىڭ ايتۋىنشا، وزبەكستاننىڭ پرەزيدەنتى شاۆكات ميرزييەۆ ورتالىق ازياداعى باۋىرلاس مەملەكەتتەرمەن قاتىناستاردى نىعايتۋعا بەلگى بەرىپ جاتقانىن اڭعارۋعا بولادى.
«بۇدان بۇرىن ەلباسى ورتالىق ازيا وداعىن قۇرۋ جونىندە باستاما كوتەرگەن بولاتىن، ەندى وسى باستامانىڭ ارى قاراي لوگيكالىق جالعاسى بولۋى مۇمكىن. جالپى، تۇركىتىلدەس حالىقتاردىڭ ەكونوميكالىق- گۋمانيتارلىق وداعىنىڭ بولۋى قولايلى ءارى وزەكتى. اتالعان ورتالىق ازيا مەملەكەتتەرى وداعىن قۇرۋ دۇرىس ساياسات دەپ ەسەپتەيمىن» ، - دەپ اتاپ ءوتتى ول.
ساياسات تانۋشى وزبەكستاننىڭ ەۋرازيالىق ەكونوميكالىق وداققا كىرۋى نەمەسە قوسىلماۋى قادامى جاقىن بولاشاقتا بەلگىلى بولاتىنىن جەتكىزدى.
اۆتور: رۋسلان عابباسوۆ
