قىتايلىق كومپانيا ديماش قۇدايبەرگەن تۋرالى مۋلت فيلم تۇسىرەدى - فوتو
دەپ حابارلايدى «قازاقپارات» ح ا ا- نىڭ قىتايداعى مەنشىكتى ءتىلشىسى.
«ديماش تانىمالدىلىققا يە بولعان كەزدە، بارلىق تانىستارىم مەن دە قازاق قىزى ەكەنىمدى ەسكە سالا باستادى. ديماش ءۇشىن جانە بارشا قازاق حالقى ءۇشىن كەۋدەمدى ماقتانىش كەرنەدى. سول كەزدە ديماشتىڭ انيمە- وبرازىن جاساپ، ول تۋرالى، ونىڭ اندەرى تۋرالى 3-4 مينۋتتىق انيماتسيالىق فيلم ءتۇسىرۋ يدەياسى تۋىندادى»، - دەدى قازاقپارات تىلشىسىنە بەرگەن سۇحباتىندا «Jebe Visual arts studio»- نىڭ تەڭ قۇرىلتايشىسى جارقىن مۇرات قىزى.
جارقىننىڭ ايتۋىنشا، ول 6 جىل بۇرىن شىنجاڭ ۋنيۆەرسيتەتىن بىتىرگەننەن كەيىن بەيجىڭگە كەلىپ، نيەتتەس بىرنەشە اداممەن انيماتسيالىق ستۋديالاردا جۇمىس ىستەي باستاعان. 2013 -جىلى سە گوسيۋنمەن بىرلەسىپ، جاۋاپكەرشىلىگى شەكتەۋلى سەرىكتەستىك قۇرعان.
«قازىرگى ۋاقىتتا بىزدە 13 ادام جۇمىس ىستەيدى، ونىمدەرىمىزدىڭ دەنى جارنامالىق روليكتەر، D3- فورماتقا وڭدەلگەن كوركەم جانە مۋلتيپليكاتسيالىق فيلمدەردىڭ ەپيزودتارى. الداعى ۋاقىتتا وسكەلەڭ قازاق جاستارى ءۇشىن حالقىمىزدىڭ مادەنيەتىن، ءداستۇرىن ناسيحاتتايتىن مۋلتفيلمدەر سەرياسىن جاساۋدى جوسپارلاپ وتىرمىز. مۋلتفيلمدەر ارقىلى بالالارعا ۇلتتىق مادەنيەتكە دەگەن ماحابباتتى ءتيىمدى سىڭىرۋگە بولادى. قازاق ەرتەگىلەرى ەكراندا كورسەتىلىپ جۇرگەن «ديسنەي» مۋلتفيلمدەرىنەن ەش كەم تۇسپەيدى»، - دەدى ج. مۇرات قىزى. جارقىننىڭ بيزنەس بويىنشا سەرىكتەسى سە گوسيۋن «Jebe» كومانداسىنىڭ جاس ەكەنىن جانە ولاردى انيماتسياعا دەگەن ماحاببات بىرىكتىرەتىنىن ايتتى.
ديماشتىڭ انيمە- وبرازىنان بولەك، Jebe انيماتورلارى قىتايعا تانىلعان قازاقستاندىق ۆولەيبولشى ءسابينا التىنبەكوۆانىڭ دا وبرازىن جاساعان. قىتاي قازاقتارىنىڭ انيماتسيا سالاسىندا ۇلكەن تابىستارعا قول جەتكىزگەنى اتاپ وتۋگە تۇرارلىق. 2015 -جىلدىڭ ماۋسىم ايىندا ق ح ر شىنجاڭ- ۇيعىر اۆتونومدى ولكەسى، ءۇرىمجى قالاسىندا اباي اتىنداعى انيماتسيا اكادەمياسى جوعارى وقۋ ورنى اشىلدى. ونىڭ ستۋدەنتتەرى «ابايدىڭ بالالىق شاعى» مۋلتفيلمىن ازىرلەپ جاتقان «اباي جولى» كومپانياسىندا جۇمىس ىستەۋدە. فيلم تۇساۋكەسەرى ەكسپو-2017 بارىسىندا الەمنىڭ ءبىرقاتار ەلدەرىندە وتەدى دەپ جوسپارلانعان. 2016 -جىلدىڭ قورىتىندىسى بويىنشا، ەتنيكالىق قازاق ارىسبەك نۇحان ۇلى قىتايدىڭ ۇزدىك انيماتورى اتاندى.
ەسكە سالا كەتسەك، بۇگىن كەشكە حۋنان سپۋتنيكتىك ارناسىنىڭ ەفيرىنەن «Singer» بايقاۋىنىڭ 9-كەزەڭى كورسەتىلەدى. وندا ديماشتىڭ ەكىنشى ورىن العانى بەلگىلى. بۇل كەزەڭدە قازاقستاندىق ءانشى تانىمال كانادالىق ءانشى سەلين ديوننىڭ «All by myself» ءانىن ورىندادى. 10-كەزەڭدە ديماش قۇدايبەرگەنوۆ ورال بايسەڭگىردىڭ «ۇمىتىلماس كۇن» ءانىن شىرقاپ، ءۇشىنشى ورىن يەلەندى جانە «Singer» بايقاۋىنىڭ اقتىق سىنىنا جولداما الدى.
