15:38, 18 - ناۋرىز 2017 | GMT +5
الماتىلىقتار ناۋرىز كۇندەرى قوشقار كوتەرۋدەن كۇش سىناسادى
الماتى. قازاقپارات - الماتىدا 22 - ناۋرىز كۇنى «استانا» الاڭى مەن الاتاۋ اۋدانىنداعى «اتلەتتەر اۋىلىندا» مەرەكەگە وراي ۇلكەن ەتنواۋىل بوي كوتەرىپ، سالتاناتتى شارالار ۇيىمداستىرىلادى، دەپ حابارلايدى قازاقپارات ءتىلشىسى.
قالا اكىمدىگىنىڭ باسپا ءسوز قىزمەتىنەن حابارلاعانداي، «استانا» الاڭىنداعى ەتنواۋىلدا باعانعا ورمەلەۋ، قازاقشا كۇرەس، قوشقار كوتەرۋ سياقتى قازاقتىڭ ۇلتتىق سپورت ويىندارى ۇيىمداستىرىلادى.
«كەز كەلگەن ادام وسى ويىندارعا قاتىسىپ، ءوزىنىڭ كۇشى مەن شىدامدىلىعىن بايقاي الادى. بۇلاردان وزگە، ارقانمەن جۇرەتىندەر، ات ۇستىندەگى كاسكادەرلار ءوز ونەرلەرىن كورسەتەدى.
«اتلەتتەر اۋىلىنداعى» سپورتتىق شارالارعا مەرەكەگە كەلگەن تۇرعىندار دا بەلسەنە ارالاسادى. مەرەكە قوناقتارى قوشقار كوتەرۋ، لاڭگى تەبۋ، ارقان تارتۋ، گىر تاسىن كوتەرۋ، قول كۇرەستىرۋ ارقىلى ءوز كۇشتەرىن سىناي الادى»، - دەلىنگەن حابارلامادا. جارىستار قورىتىندىسى بويىنشا جەڭىمپازدارعا باعالى سىيلىقتار تابىس ەتىلەدى.
اۆتور: الماس مۇقاش ۇلى
