ورالدا كۇيشى ەدىگە نابيەۆتىڭ كەشى ءوتتى - فوتو
استراحان وڭىرىندە ءومىر ەسىگىن اشقان ەدىگە نابيەۆ اتا-بابادان كەلە جاتقان كۇي ءداستۇرىن ۇزبەي، كۇنى بۇگىنگە دەيىن جالعاپ كەلەدى. جاس كەزىندە سپورتپەن اينالىسىپ، ءان دە شىرقاعان ەدىگە كەيىن مادەني جانە رۋحاني سالاعا ءبىرجولا اۋىستى.
دومبىرانى سولاقاي تارتاتىن كۇيشىنىڭ ەرەكشەلىگى، ءار كۇيدىڭ تاريحىن ايتا وتىرىپ، ورىندايدى. ءوزىنىڭ ايتۋىنشا، جەتپىس شاقتى كۇيدى بىلگەنىمەن، ءقازىر سونىڭ ەلۋدەن استامىن تارتىپ بەرە الادى. ولاردىڭ ىشىندە سيرەك تارتىلاتىن، ەستىلمەگەن كۇيلەر دە بارشىلىق. ەدىگە نابيەۆ بوكەي حاندىعى مەن اق جايىق وڭىرىندە ەرتەدە عۇمىر كەشكەن انشىلەردىڭ تۋىندىلارىن دا جاقسى بىلەدى. جاس شاعىندا تاماعىن اۋىرتىپ الىپ، ءاندى قويىپ كەتكەنىمەن، سول اسىل مۇراعا دەگەن ىڭكارلىگى باسىلعان ەمەس. ءار ءاننىڭ شىعۋ تاريحىن اڭگىمەلەپ، كەيىنگى بۋىنعا جەتكىزىپ وتىرادى.
ال كۇيدى دومبىرانى سابالاماي، باپپەن، سىرباز تارتۋدىڭ شەبەرى دەسە بولادى. بۇل جولى دا جينالعان كورەرمەندەر ەدىگە تارتقان كۇيدى تىڭداپ، ەكى ساعاتتاي تاپجىلماي وتىردى. ونەرپازدىڭ تاعى ءبىر قىرى، دومبىرا جاساۋدىڭ شەبەرى ەكەندىگى. قازىرگى تاڭدا ونىڭ قولىنان شىققان دومبىرالارمەن ءانشى- كۇيشىلەر شەتەلدەرگە دە شىعىپ ءجۇر.
وسى كەشتە الدى حالىقارالىق بايقاۋلاردىڭ لاۋرەاتى اتانىپ ۇلگەرگەن ءادىل احمەتوۆ، جاسۇلان زيننەدينوۆ، بەرىك شايماردانوۆ، ماكسيم كارمىشەۆ ەدىگە نابيەۆ جاساعان دومبىرامەن ساحناعا شىعىپ، كۇي ورىندادى.
ال ج. زيننەدينوۆ پەن ب. شايماردانوۆ كۇي تارتىس جاساپ، كورەرمەندەردىڭ دەلەبەسىن قوزدىردى. دومبىراشى، «ورال سازى» فولكلورلىق- ەتنوگرافيالىق ءانسامبلىنىڭ جەتەكشىسى اسقار كەنجەعالييەۆ جۇرگىزگەن شارا بارىسىندا قازاقستان جازۋشىلار وداعىنىڭ مۇشەسى، اقىن ايتقالي نارىكوۆ، قۇرمانعازى اتىنداعى مۋزىكا كوللەدجىنىڭ ديرەكتورى، دومبىراشى نۇرجان سەرتەكوۆ، كۇيشىنىڭ اپاسى ءماستۋرا نابيەۆا، ونەر جاناشىرى تولەگەن سافۋللين جانە باسقالار جىلى لەبىزدەرىن ءبىلدىردى.
زەينەتكەرلىك جاستا بولسا دا، كۇي ونەرىن تالماي ناسيحاتتاپ كەلە جاتقان ە. نابيەۆكە وبلىستىق مادەنيەت، مۇراعاتتار جانە قۇجاتتاما باسقارماسىنىڭ باسشىسى داۋلەتكەرەي قۇسايىنوۆتىڭ العىسحاتى تابىس ەتىلدى.
