نازاربايەۆ: مەن تۋرالى جازىلعان ولەڭدەر مەن تۇسىرىلگەن فيلمدەر ماعان ۇنامايدى
بۇل تۋرالى Sputnik قازاقستان حابارلايدى.
پرەزيدەنتتىڭ باق وكىلدەرىمەن كەزدەسۋى بارىسىندا Esquire.kz سايتىنىڭ شەف-رەداكتورى گۇلنار باجكەنوۆا: «سوڭعى ۋاقىتتا ءسىزدىڭ قۇرمەتىڭىزگە ولەڭدەر جازىلىپ، كينو ءتۇسىرىلىپ، ەسكەرتكىشتەر قويىلىپ جاتىر، دەپۋتاتتار دا ءتۇرلى ۇسىنىستار جولداپ جاتىر. كونستيتۋتسيانىڭ 91-بابىن وزگەرتۋ ارقىلى تۇڭعىش پرەزيدەنتتىڭ مارتەبەسىن بەكىتىپ تە قويدى. مەنىڭ ساۋالىم قاراپايىم عانا: ءسىز بۇعان قالاي قارايسىز؟ سىزگە بۇل كەرەك پە؟ الدە مۇنىڭ ءبارى سولاردى جاساپ جاتقان ادامدارعا قاجەت پە؟»، - دەپ سۇرادى.
«ءبىر سوزبەن عانا ايتا الامىن: ماعان مۇنداي نارسەلەر كەرەك ەمەس. مەن بۇل تۋرالى ۇنەمى اشىق ايتىپ ءجۇرمىن»، - دەدى پرەزيدەنت.
ول مارك اۆرەليدىڭ «ەسكەرتكىش سوعۋ ارقىلى، كەلەر ۇرپاق سەنى ەسىنە الادى دەپ ويلاما» دەگەن ءسوزىن كەلتىردى.
«كەزىندە لەنيننىڭ، ستاليننىڭ ەسكەرتكىشىن شۋىلداپ قولداعاندار قازىر نە بولدى. سول قولداعان ادامدار الگى تۇلعالاردى وزدەرى قۇلاتىپ تاستادى. كەيىن پرەزيدەنتتىكتەن كەتكەن كەزدە، مەن كەلەر ۇرپاقتىڭ شەشىمىنە اسەر ەتە المايتىن بولامىن»، - دەدى نازاربايەۆ.
«مەن ءبىر نارسەگە عانا كەلىسىمىمدى بەردىم، ول نازاربايەۆ اتىنداعى ۋنيۆەرسيتەت. بۇل ەلىمىزدەگى بارلىق ۋنيۆەرسيتەتتەرگە ۇلگى بولاتىن ەرەكشە وقۋ ورنى. بۇعان بارشا قوعامنىڭ، ۇكىمەتتىڭ نازارىن اۋدارىپ، دۇرىس دامۋ جولىندا بولۋ ءۇشىن كەلىستىم. بۇل ۋنيۆەرسيتەت تەك جوعارعى وقۋ ورنى عانا ەمەس، قازاقستانداعى عىلىمي ورتالىققا اينالدى. جانە سولاي قالادى»، - دەدى پرەزيدەنت.
ەلباسى وزگە ۇسىنىستاردىڭ ەشبىرىنە ەشقاشان كەلىسىم بەرمەگەنىن قاداپ ايتتى.
«سول سەبەپتى تاعى دا قايتالاپ ايتايىن، ماعان بۇلار كەرەك ەمەس. ماعان بۇل ۇنامايدى. ساياسات تۋرالى، ءاربىر ادام مەن ونىڭ ىستەرى تۋرالى، قانداي ادام بولدى، قانداي اكە، قانداي انا، ارتىنا قانداي ءىز قالدىردى، اڭگىمە وسى جاعىندا بولۋى ءتيىس. جاڭا قازاقستان مەملەكەتىن قۇرۋ ءۇشىن ماعان حالىقتى باسقارىپ، كارتادان ورىن تابۋ كەرەك بولدى. وسى ەلدىڭ استاناسىن نولدەن باستاپ قۇرىپ، جوقتان بار ەتتىك. مىنە قاراڭىزدار. استانا - ەلىمىزدىڭ ماقتانىشىنا اينالدى»، - دەدى نازاربايەۆ.
سوڭعى جىلدارى ەلىمىزدە نۇرسۇلتان نازاربايەۆ تۋرالى بىرنەشە سەريالى فيلمدەر ءتۇسىرىلىپ، ءبىرقاتار كىتاپتار جازىلعان. ءتىپتى ونىڭ اتىن ەل استاناسىنا، اۋەجايعا، باسقا دا نىساندارعا بەرۋ دە ۇسىنىلدى. الايدا مەملەكەت باسشىسى استانانىڭ اتىن اۋىستىرۋ تۋرالى ۇسىنىسقا قارسى شىعىپ، قولدامادى.
پرەزيدەنت وسى سۇحبات بارىسىندا كەلەسى پرەزيدەنت سايلاۋىنا قاتىسۋ مۇمكىندىگى تۋرالى جانە جەردىڭ ساتىلۋىنا قاتىستى دا ويىن ايتتى. سونداي-اق، ول ءوزىم تاعايىندايتىن ادامداردىڭ سەنىمنەن شىقپاۋى جانىما باتادى دەگەن بولاتىن.
