قانات يسلامنىڭ ەكسپوداعى جەكپە-جەگى چەمپيوندىق اتاق ءۇشىن بولۋى مۇمكىن
بۇل تۋرالى بۇگىن ق ر مادەنيەت جانە سپورت ءمينيسترى ارىستانبەك مۇحامەدي ۇلىمەن بولعان كەزدەسۋدە قانات يسلامنىڭ دەمەۋشىسى باۋىرجان وسپانوۆ ءمالىم ەتتى، دەپ حابارلايدى قازاقپارات.
«قانات قازىر جالپى رەيتينگتە ۇزدىك وندىققا كىرىپ وتىر. نەگىزگى ءۇش تۇجىرىم بويىنشا الەم چەمپيونى اتاعىنا شىعا الادى. ءبىراق وعان دەيىن كۇتپەي، بيىل مامىردا تاعى دا ءبىر جەكپە- جەكتى امەريكادا وتكىزۋدى جوسپارلاپ وتىرمىز. ۇلكەن جەردە ءوتۋى كەرەك. قازىر ونى كەلىسىپ جاتىرمىز. ودان كەيىن قۇداي قالاسا، ەكسپودا جەكپە- جەك وتكىزەمىز دەپ وتىرمىز. بۇل جەردە نەگىزگى دەگەن ءۇش تۇجىرىمدا الەم چەمپيونى اتاعىنا شىعۋعا كەلىسىپ جاتىر. WBO دەگەن بار. ونىڭ چەمپيونى كانەلو قازىر جوعارى كەتىپ جاتىر، سونىڭ ورنىنا WBO ۇيىمى قاناتتى كورگىسى كەلەدى. كانەلو كەتسە، ونىڭ ورنىنا چەمپيوندىق اتاق ءۇشىن تالاستى ەكسپودا قانات ءتۇسۋى مۇمكىن»، - دەپ اتاپ ءوتتى ول.
ب. وسپانوۆتىڭ سوزىنشە، WBO- مەن قاتار، وزگە دە ۇيىمدارمەن چەمپيوندىق بەلبەۋگە قاتىستى كەلىسسوزدەر جۇرگىزىلۋدە. «تاعى ەكى تۇجىرىم بار، WBA جانە IBF دەگەن ۇيىمدار، وسىلارمەن دە كەلىسسوزدەر جۇرگىزىپ جاتىرمىز. بۇل سالماقتا الەمنىڭ ەڭ مىقتىلارى تۇر: مەيۆەزەر، كانەلو، پاكياو سياقتى. قانات ەندى سول تۇجىرىمدار بويىنشا كەلىسىم جۇرگىزۋدە. قۇداي قالاسا، مامىر ايىنداعى جەكپە- جەك ءساتتى وتسە، ولارمەن الەمدىك چەمپيوندىققا تالاساتىنداي، كەلىسىم شارتقا وتىرۋعا بولادى»، - دەدى مەسەنات.
ايتا كەتەيىك، بۇگىن ق ر مادەنيەت جانە سپورت ءمينيسترى ارىستانبەك مۇحامەدي ۇلى كاسىپقوي بوكسشى قانات يسلامدى جانە تانىمال كاسىپكەر باۋىرجان وسپانوۆتى قابىلداپ، ەكسپو اياسىندا قانات يسلامنىڭ كاسىپقوي بوكس كەشىنىڭ كۇنىن الدىن الا جاريا ەتكەن بولاتىن.
