قازاقستاندىق كيىم ءوندىرىسى شەتەلدىك ءسانقويلاردى قىزىقتىرا باستادى - كەسكىن

استانا. قازاقپارات - قازاقستاندىق كيىم ءوندىرىسى شەتەلدىك ءسانقويلاردى ءسوزسىز قىزىقتىرا باستادى.

وتاندىق ديزاينەرلەر ميلاندا وتكەن ءسان اپتالىعى اياسىنداعى ەڭ ءىرى دۇنيەجۇزىلىك كورمەدە وزدەرىنىڭ برەندتەرىن لايىقتى تانىستىردى. ەۋروپالىقتار قازاقستاندىق سانگەرلەردىڭ كيىمدەرىنىڭ ءبىرىن قالدىرماي ساتىپ الىپتى. ونداعى بەلگىلى سىنشىلار ءتىپتى قازاقستاندىق ءسان ۇلگىسىن باسقالارمەن سالىستىرعاندا ايرىقشا دەپ باعا بەرگەن ەكەن.

كوزدىڭ جاۋىن الار بۇل ادەمى كويلەكتەر، جەمپىرلەر مەن كارديگاندار ۇلتتىق ناقىشتا جاسالعان. «2017-2018 دىڭ كۇز- قىس توپتاماسىن» جاساۋ ءۇشىن اۆتور فاريزا سۇلتان شابىتتى قازاقتىڭ ءداستۇرلى قولونەرى، قۇراق قۇراۋ ارقىلى الىپتى. كيىمدەر قولمەن، سونداي-اق توقىمالى ماشينانىڭ كومەگىمەن جاسالعان. «قۇراقتى ستيل» ۇسىنىلعان بارلىق مودەلدەردە بار. سونىڭ ارقاسىندا توپتاما كىرپياز شەتەلدىك كورەرمەننىڭ كوڭىلىن بىردەن جاۋلاپ العان.

«ءبىز ميلاندا 21 ءتۇرلى كيىم ۇلگىسىن ۇسىندىق. سولاردىڭ تەك التاۋىن عانا ەلگە الىپ كەلدىك. ويتكەنى، بۇل ۇلگىلەردى ساتپاي، ارنايى قالدىرعام. ءبىراق كوپتەگەن ادامدار كورمە اياقتالماي جاتىپ كيىمدەرىڭىزدى ساتىڭىز دەپ قولقا سالدى. جارتى كوللەكتسيامدى بىردەن ساتىپ، ەلگە الىپ كەلگەن توپتاماما تاپسىرىستار قابىلداپ كەلدىم»، - دەدى ديزاينەر فاريزا سۇلتان.

فاريزانىڭ توپتاماسىنا يتاليا مەن بەلگيانىڭ سانگەرلەرى قاتتى قىزىعىپ، بىرلەسىپ جۇمىس جاساۋ ءۇشىن كەلىسىم- شارتقا قول قويىپ ۇلگەرىپتى. دەگەنمەن، ميلان ءسان اپتالىعىندا تانىستىرىلعان وتاندىق 5 ديزاينەردىڭ دە كيىمدەرى ەۋروپالىق كورەرمەندەردى ءوزىنىڭ ەرەكشە ۇلگىسىمەن جانە تىڭ يدەيالارىمەن ءتانتى ەتكەن. ءساندى كيىمنىڭ دۇنيەجۇزىلىك كورمەسىن 40 مىڭنان استام ءسانقوي، ستيليستەر جانە ديزاينەرلەر قاتىسادى.

«ميلان - بۇل ءسان اپتالىعى. ول نيۋ- يورك، لوندون جانە پاريجدەگىدەي ۇلكەن تورتتىككە كىرەدى. شىن مانىندە وندا وتە تالاپشىل كورەرمەن بارادى جانە ولاردىڭ تالعامدارى وتە بيىك. ويتكەنى ءسان اپتالىعىنا قاتىسۋعا الەمنىڭ تۇكپىر- تۇكپىرىنەن كوپتەگەن تانىمال برەندتەر كەلەدى. ال، مەن ءبىزدىڭ ديزاينەرلەرى شەتەلدىكتەردى ءتانتى ەتىپ، تاپسىرىستار قابىلداپ كەلەتىنىن كۇتپەگەن ەدىم»، - دەدى ءسان ءۇيىنىڭ كرەاتيۆتى ديرەكتورى اياجان جاقسىباي.

قازاقستاندىق ديزاينەرلەردىڭ حالىقارالىق كورمەدە - جارقىراپ كورىنۋ اياجان جاقسىبايدىڭ باعزىداعى ارمانى ەدى. ول «قازاقستان برەندى» باعدارلاماسىن جاساپ، بىرنەشە مەرزىم وتاندىق ديزاينەرلەرمەن بەلسەندى جۇمىس ىستەدى. سونىڭ ارقاسىندا وتاندىق سانگەرلدەر شەتەلدىكتەردى ءتانتى ەتتى.

«شەتەلدىكتەرتە ەشكىمگە ۇقساماي ەرەكشەلەنىپ تۇراتىن كيىمدەر وتە ۇنايدى. ولار جاڭا نارسەگە قۇمار. سەبەبى، بۇگىنگى تاڭدا مودانى تۇتاستاي العاندا ءبىر- ءبىرىن كوشىرۋ، ياعني پلاگياتتىق ءجۇرىپ جاتىر. ال، ءبىزدىڭ برەندتەرىمىز، كوللەكتسيالارىمىز قازاقتىڭ ۇلتتىق ويۋ- ورنەكتەرىمەن، وزىندىك قولتاڭباسىمەن ەرەكشەلەنەدى. الەمدىك اۋديتوريا مۇنداي نارسەنى كورمەگەن، سول ءۇشىن ءبىزدىڭ قىزداردىڭ كيىمدەرىنە قىزىقتى»، - دەدى ءسان ءۇيىنىڭ كرەاتيۆتى ديرەكتورى اياجان جاقسىباي.

يتالياداعى ءساتتى ساپارلارىنىڭ قورىتىندىسىن ديزاينەرلەر توبى الماتىعا ورالعاسىن جاريالادى. وتاندىق كۋتيۋرەلەر قازاقستاندىق ءساننىڭ بولاشاعى زور ەكەنىنە ءارى ەكسپورتقا شىعارىنا سەنىمدى.

 

«الماتى» تەلەارناسى