سەرىك احمەتوۆتىڭ جاقتاستارىنىڭ ءبىرى قاماۋدان بوساتىلادى
قاراعاندى قالاسى قازىبەك ءبي اۋداندىق سوتىنىڭ باسپا ءسوز قىزمەتىنىڭ حابارلاۋىنشا، سوت قاۋلىسىمەن ىسقاقوۆقا قاتىستى مەرزىمىنەن بۇرىن شارتتى تۇردە بوساتۋ تۋرالى نورما قابىلداندى.
«سوتتالۋشى ىسقاقوۆ بولاتبەك جۇمابەك ۇلىنىڭ مەرزىمىنەن بۇرىن بوساتۋ تۋرالى ءوتىنىشى قاناعاتتاندىرىلدى. بۇعان دەيىن بيىلعى اقپان ايىندا ىسقاقوۆقا قاتىستى «ق ر تاۋەلسىزدىگىنىڭ 25 جىلدىعىنا بايلانىستى راقىمشىلىق تۋرالى» زاڭ نورماسى قابىلداندى جانە زاڭ كۇشىنە ەنگەن ساتتەن باستاپ ونىڭ جازا وتەۋ مەرزىمىنىڭ 1/4 بولىگى، ياعني 1-اي 14 كۇنى قىسقاردى.
قازىرگى ۋاقىتتا ىسقاقوۆ ءالى 1-اي 23 كۇن جازاسىن وتەۋى ءتيىس»، - دەپ حابارلادى قاراعاندى قالاسى قازىبەك ءبي اۋداندىق سوتىنىڭ باسپا ءسوز قىزمەتى.
ەندى 1-اي 23 كۇن ىسقاقوۆ پروباتسيالىق باقىلاۋدا بولادى، وعان قاراعاندى وبلىسى قاج دەپارتامەنتىنىڭ پروباتسيا قىزمەتىنە حابارلاماي تۇرعىلىقتى جەرىن اۋىستىرۋعا جانە 23:00 دەن كەيىن ويىن-ساۋىق مەكەمەلەرىندە بولۋعا تىيىم سالىنعان. زاڭ كۇشىنە ەنگەن سوڭ، ءىس جۇزىندە بوساتىلعان بولاتبەك ىسقاقوۆ ۇكىم شىققالى وتىرعان اك 159/1 وقشاۋلاعىشىنان شىعارىلادى.
ەسكە سالا كەتسەك، «مەتاللۋرگيا- مەتاللوڭدەۋ» يندۋستريالدىق پاركى» ج ش س بۇرىنعى ديرەكتورى بولاتبەك ىسقاقوۆ ق ر ق ك 176-بابى («سەنىپ تاپسىرىلعان بوتەن مۇلىكتى يەلەنۋ نەمەسە ىسىراپ ەتۋ») بويىنشا قىلمىس جاساۋدا ايىپتى دەپ تانىلدى.
وعان 3,6 جىلعا باس بوستاندىعىنان ايىرۋ تۇرىندەگى جازا تاعايىندالدى. اتاپ ايتقاندا، بۇرىنعى پرەمەر-مينيستر سەرىك احمەتوۆ ق ر ق ك 176-بابى («سەنىپ تاپسىرىلعان بوتەن مۇلىكتى يەلەنۋ نەمەسە ىسىراپ ەتۋ»)، 310-بابى («كاسىپكەرلىك قىزمەتكە زاڭسىز قاتىسۋ») جانە 307-بابى («قىزمەتتىك لاۋازىمىن اسىرا پايدالانۋ») بويىنشا قىلمىستاردى جاساعانى ءۇشىن 8 جىلعا باس بوستاندىعىنان ايىرىلدى.
