پۋتين وڭتۇستىك وسەتيا اسكەرىنىڭ رەسەي ارمياسىنا قوسىلۋىن ماقۇلدادى
استانا. قازاقپارات - رەسەي پرەزيدەنتى ۆلاديمير پۋتين ۇكىمەتكە گرۋزيادان ءبولىنىپ كەتكەن وڭتۇستىك وسەتيا ايماعىمەن ايماقتىڭ قارۋلى كۇشتەرىنىڭ رەسەي ارمياسى قۇرامىنا قوسىلۋىنا مۇمكىندىك بەرەتىن كەلىسىم جاساۋعا بۇيرىق بەردى.
رەسەي ءىس جۇزىندە وڭتۇستىك وسەتيانى بىرنەشە جىلدان بەرى باقىلاۋدا ۇستاپ كەلەدى. دەگەنمەن، رەسمي ماسكەۋ بۇل ايماقتى جەكە مەملەكەت ساناپ كەلگەن.
كەلىسىم جوباسى بويىنشا، سەپاراتيستەر ماسكەۋدىڭ ماقۇلداۋىنان سوڭ قارۋلى كۇشتەرگە پروتسەدۋرانىڭ جاڭا جۇيەسىن ەنگىزۋى ءتيىس بولادى. قۇجات جوباسىندا وڭتۇستىك وسەتيا قارۋلى كۇشتەرىنىڭ قۇرىلىمى مەن مىندەتى كەلىسىمنىڭ تۇپكىلىكتى ماتىنىندە انىقتالاتىنى ايتىلادى. كەلىسىم سونىمەن قاتار وڭتۇستىك وسەتيا اسكەرىنىڭ وسى ايماقتاعى رەسەي اسكەري بازاسىنا اۋىسۋىنا مۇمكىندىك بەرەدى. كرەمل -14 ناۋرىزدا پۋتين قول قويعان، سىرتقى ىستەر جانە قورعانىس مينيسترلەرىنە سەپاراتيستەرمەن بىرگە وڭتۇستىك وسەتيادا ءتيىستى كەلىسىمگە قول قويۋدى تاپسىراتىن جارلىعىن جاريالادى. گرۋزيا بۇل جاعدايعا قاتىستى ازىرگە كوممەنتاري بەرگەن جوق.
وڭتۇستىك وسەتيا گرۋزيادان 1991-1992 -جىلدارداعى ەكى مىڭ ادامنىڭ ءومىرىن قيعان قارۋلى قاقتىعىستاردان سوڭ ءبولىنىپ كەتكەن. 2008 -جىلى تامىزدا رەسەي ايماققا «بەيبىت تۇرعىنداردى گرۋزين اسكەريلەرىنىڭ شابۋىلىنان قورعاۋ ءۇشىن» اسكەر جىبەرگەن. ا ق ش پەن ەۋروپا وداعى قولدايتىن گرۋزيا مۇنى ءوزىنىڭ تەرريتورياسىنا اسكەري باسقىنشىلىق جاساۋ دەپ دەپ باعالاعان.
2008 -جىلى تامىزدا رەسەي مەن گرۋزيا اراسىنداعى قىسقا مەرزىمدىك قاقتىعىستان سوڭ ماسكەۋ وڭتۇستىك وسەتيا مەن ابحازيانىڭ تاۋەلسىزدىگىن مويىنداعان. بۇل ايماقتاردا رەسەيدىڭ مىڭداعان اسكەرى بار. ناتو مەن باتىس ەلدەرى بۇل اسكەر ايماقتاعى اسكەري قيمىلداردى توقتاتۋ تۋرالى كەلىسىمگە قايشى كەلەدى دەيدى.
«ازاتتىق» جاڭالىقتارى
