نازاربايەۆ: مەن ءۇشىن كادرلاردى تاڭداۋ - ەڭ قيىنى
جۋرناليست نۇرتورە بايتىلەس ۇلى ق ر پرەزيدەنتىنەن:
«ءسىزدىڭ قۇزىرەتىڭىزدە شەشىم قابىلداۋ دەگەن ماسەلە بار. كەيبىرەۋدى تاعايىندايسىز، كەيبىرەۋدى الاسىز. سول العان كەزدە ولاردىڭ سەنىمىڭىزدەن شىقپاي قالعانى ءسىزدىڭ جانىڭىزعا باتا ما؟» - دەپ سۇرادى.
وعان ەلباسى شەشەندەردەن قالعان اتالى ءسوزدى مىسال ەتە وتىرىپ جاۋاپ بەردى:
- باتادى. باياعىدا بۇقار جىراۋدان سۇراعان ەكەن عوي، ءسىز ءۇشىن ەڭ قيىن نارسە نە بولدى بۇل دۇنيەدە دەپ. سوندا ول: «كوش باستاۋ قيىن ەمەس، قوناتىن كول بولسا؛ قول باستاۋ قيىن ەمەس، قول باستايتىن ەر بولسا، دۇنيەدەگى ەڭ قيىن نارسە - ەل الدىنا شىعىپ ءسوز باستاۋ»، - دەگەن ەكەن. سول سياقتى مەن ءۇشىن دە، باسقالارى ءۇشىن دە كادرلاردى تاڭداۋ - ەڭ قيىنى.»
بۇعان دەيىن حابارلاعانىمىزداي، كەزدەسۋگە قاتىسۋشىلار «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋدى ىسكە اسىرۋ اياسىندا ەل ەكونوميكاسىن ترانسفورماتسيالاۋ ۇدەرىسىنىڭ ءبىرقاتار اسپەكتىلەرىن، سىبايلاس جەمقورلىققا قارسى كۇرەس ماسەلەلەرىن، قازىرگى ساياسي جاڭعىرۋ كەزەڭىنىڭ ەرەكشەلىكتەرىن، ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندەگى قازاقستاننىڭ سىرتقى ساياسي باسىمدىقتارىن، سونداي- اق باسقا دا ماڭىزدى جايتتاردى تالقىلادى. كەزدەسۋگە «قازاقستان» ، «حابار» ، «مير» تەلەارنالارىنىڭ، «ايقىن» گازەتىنىڭ، «Esquire» جۋرنالىنىڭ، «قازاقپارات» اقپارات اگەنتتىگىنىڭ جۋرناليستەرى قاتىستى.
