اقتوبەدەگى مايىتتىك دونوردىڭ اعزالارى استاناعا جونەلتىلدى
اقتوبەلىك دارىگەرلەر العاشىندا وڭتۇستىك كورەيا دارىگەرى كۆانگ ۆۋنگ ليدەن ءدارىس الىپ، شەبەرلىك ساباعىن وتكىزدى. بيىل بۇيرەك اۋىستىرۋ وتاسىن وزدەرى جاساپ جاتىر. بۇل جولى 45 جاستاعى ايەلدىڭ «ميى ولگەن» دياگنوزىن قويعان سوڭ ونىڭ تۋعان- تۋىستارىمەن كەلىسسوز جۇرگىزىلدى. كەلىسىمنەن سوڭ دارىگەرلەر الماتى مەن استانا قالالارىنا ءتۇرلى ساراپتامالار جىبەرگەن.
«مايىتتىك دونور بەلگىلى بولعان سوڭ 9 ادامدى شاقىرىپ، سايكەس كەلگەن 3-4 ادامنان جاعدايى ناشار ناۋقاس تاڭداپ الىندى. ءبىرىنشىسى، 36 جاستاعى ايەل. ول ءبىر جىلدان بەرى اپپاراتقا تاڭىلعان. ەكىنشىسى، 58 جاستاعى ەر ادام. ول ءۇش جىلدان بەرى گەمودياليز قابىلداپ ءجۇر. ءبىر تۇندە ەكى ادامنىڭ بۇيرەگى اۋىستىرىلدى. وتا ءساتتى ءوتتى. قازىرگى كەزدە ناۋقاستاردىڭ جاعدايى قالىپتى»، - دەدى اقتوبە وبلىسىنىڭ باس حيرۋرگى ەرلان سۇلتانگەرەيەۆ.
اقتوبەلىكتەر ەكى بۇيرەك اۋىستىرۋ وتاسىن جاساسا، مايىتتىك دونوردىڭ جۇرەك، ەكى وكپەسى، باۋىر، ەكى كوزى استاناعا جىبەرىلگەن. ءبىر ادامنىڭ اعزالارى بارلىعى 7 ادامعا سالىندى.
ايتا كەتەيىك، اقتوبە وبلىسىندا 24 بۇيرەك اۋىستىرۋ، 7 باۋىر اۋىستىرۋ وتاسى جاسالدى. ناۋقاستار مەن دونورلاردىڭ جاعدايى جاقسى. وڭتۇستىك كورەيا دارىگەرلەرى قازىرگى ۋاقىتتا اقتوبەلىكتەرگە باۋىر اۋىستىرۋ وتاسىن جاساۋدى ۇيرەتىپ جاتىر.
