دوللار قايتا قىمباتتاپ جاتىر

استانا. قازاقپارات - قور بيرجاسىندا ءبىراز ۋاقىت السىرەگەندەي بولعان ا ق ش اقشاسىنىڭ باعامى بۇگىن دە كوتەرىلدى، - دەپ حابارلايدى ك ت ك ارناسى.

15-ناۋرىز كۇنى 1 دوللاردىڭ قۇنى - 319 تەڭگە. ال نەبارى ەكى اپتا بۇرىن ول 311 گە دەيىن ارزانداعان. سوعان قاراعاندا، تەڭگەنىڭ نىعايۋى وسىمەن توقتاعان سەكىلدى. ويتكەنى ا ق ش ۆاليۋتاسىنىڭ باعامى بىرتىندەپ قايتا ءوسىپ جاتىر.

بار- جوعى بىرەر تاۋلىكتىڭ ىشىندە -  316، ودان ءارى 318، ال بۇگىن 319 تەڭگە 5 تيىن. اقپاندا بىرنەشە مارتە نىعايىپ قۋانتقان تەڭگە مىنا كەستەدەن بايقالىپ تۇرعانداي باسقان ىزىمەن كەرى شەگىنىپ جاتىر.

ال ساراپشىلار دوللار بۇدان دا جوعارى بولادى دەيدى. ويتكەنى مۇناي باعاسى قايتا قۇلدىرۋدا. بۇعان دەيىن 56 دوللاردان ساتىلعان Brent ماركالى قارا التىننىڭ ءبىر باررەلى بۇگىن 51 دوللارعا ءتۇسىپ كەتتى. تەڭگەنىڭ اقپانداعى نىعايۋىنا ەكسپورتەرلەردىڭ سالىق تولەۋى دە سەبەپ بولعان ەكەن. قارجىگەرلەر دە مۇنى ۋاقىتشا كۇشەيۋ دەپ اتادى. ال مۇناي باعاسى ارزانداعانىمەن، بۇل جاعداي جانارماي قۇنىنا ەش اسەر ەتپەيىن دەپ تۇر.

«مەنىڭ بولجاۋىم بويىنشا، قارا التىننىڭ قۇنى 40 دوللارعا دەيىن ءتۇسۋى مۇمكىن. سالدارىنان تەڭگە تاعى السىرەيدى. ءبىراق قارا التىن ارزانداپ جاتقاندا، جانارمايدىڭ باعاسى دا تۇسەدى دەپ كۇتۋدىڭ قاجەتى جوق. ءبىزدىڭ نارىق رەسەيگە بايلانعان. سول سەبەپتى، الدا كورشىلەرىمىز كولىك وتىنىن قىمباتتاتىپ جاتسا، بىزدەگى بەنزين باعاسى دا ارتىنشا كوتەرىلە تۇسەدى»، - دەيدى ەكونوميكالىق ساراپشى عالىم قۇسايىنوۆ.