قارىز الىپ ومىراۋىن ۇلكەيتكەن الماتىلىق ارۋدىڭ ءتوسى ءبىر ايدان سوڭ سولىپ قالدى
ءبىزدىڭ رەداكسيامىزعا حابارلاسىپ، ەسىمىن جازباۋىمىزدى وتىنگەن الماتى قالاسىنىڭ تۇرعىنى وسىدان جارتى جىل بۇرىن گيالۋرون وتتەگىسىمەن ءتوسىن ۇلكەيتكەن، ءتىپتى قۇنى ءبىر ميلليونعا جەتەتىن پروتسەدۋرا ءۇشىن نەسيە الىپ، ءالى كۇنگە دەيىن قارىزىن جاۋىپ جۇرگەنىن ايتتى.
ءبىر وكىنىشتىسى، ۇلكەيتكەن ومىراۋى ءبىر اپتادان سوڭ بۇرىنعى قالپىنا قايتا كەلىپ العان، دەپ حابارلايدى NUR. KZ.
«2016 -جىل تامىزدىڭ 30 - كۇنى قونايەۆ پەن جىبەك جولى كوشەسىنىڭ قيىلىسىندا ورنالاسقان «كوسمەتولوگيا جانە دەرماتولوگيا ينستيتۋتىنا» كەڭەس الۋعا باردىم. مەنى قابىلداعان ماماننىڭ ەسىمى - ساودات جۋرايەۆا. ول كىسىنى Instagram پاراقشاسىنان تاپقانمىن. «ءسىزدىڭ جۇمىستارىڭىزدى كوردىم، گيالۋرين وتتەگى ارقىلى ءتوسىمدى ۇلكەيتكىم كەلەدى، جالپى بۇل پروتسەدۋرا قالاي، اۋىر ەمەس پە؟»، - دەپ سۇرادىم. ول كىسى ماعان ەشقانداي قيىندىق جوق ەكەنىن، جەڭىلدىك جاساپ بەرەتىنىن ايتىپ، ءتوسىمدى كوردى. ءار ومىراۋىما 20 م ل شپريتسپەن 5 دانا دارىلىك پرەپاراتتى سالساق، فورماسى جاقسى بولاتىنىن ايتىپ سەندىردى»، - دەيدى ومىراۋىن ۇلكەيتكىسى كەلگەن بويجەتكەن.
ونىڭ ايتۋىنشا، دارىگەر وعان باعاسى 350 دوللارلىق 20 م ل گيالۋروندى جەڭىلدىكپەن 320 دوللارعا جاساپ بەرۋگە دايىن ەكەنىن جانە ەشقانداي اۋىرلىقتى سەزىنبەيتىنىن مالىمدەگەن.
«ءبىر جاعىنان ءۇش جىل كەپىلدىك بەرەمىز دەگەن سوڭ، كادىمگىدەي سەندىم، ونىڭ ۇستىنە ءۇش جىلدان سوڭ فورماسىن ۇستاۋ ءۇشىن ءبىر- ەكى شپريتس گيالۋرون قۇيىپ تۇرساڭ جەتەدى دەگەن. مەنىڭ ءتوسىم مۇلدەم جوق بولعاندىقتان، وپەراتسياعا كەلىستىم. ەرتەسى كەشكى ساعات بەستە وتا جاساتۋعا باردىم. ونىڭ قۇنى 3200 دوللاردى قۇرادى. جانىمدا قۇربىم بولعان، ەكەۋمىز دارىگەردى ءبىر ساعاتتاي كۇتتىك، سودان مەنى وپەراتسيا جاسايتىن بولمەگە اپاردى. فورماسىن سىزىپ، كەۋدەمدى ۇلكەيتۋدى باستادى. پروتسەدۋرا وتە اۋىر بولدى، مەن قولىمدى قوزعالتا الماي، ەسەڭگىرەپ قالدىم، ءبىراق جاقسى ناتيجەمەن شىقتىم. ۇيگە كەلگەن سوڭ تۇنىمەن اۋىردىم.
بىرنەشە كۇندە ءبارى جاقسى بولعان سياقتى كورىنگەن، ءبىراق ءتورت كۇننەن سوڭ كەۋدەمنىڭ كولەمى كىشىرەيە باستادى. نەگىزى، مەن قايتا قارالۋعا ون كۇننەن كەيىن بارۋعا ءتيىس ەدىم. ءبىراق التىنشى كۇنى ومىراۋىم مۇلدەم كىشىرەيىپ كەتتى.
سودان ساوداتتىڭ قابىلداۋىنا قايتا جازىلىپ، گيالۋروننىڭ كىشىرەيىپ جاتقانىن ايتتىم. ول باسىندا ىسىك بولعان، گيالۋرون سولاي اعزاعا ءسىڭىپ كەتەتىنىن، باستىسى قالعان بولىگىنىڭ تۇراتىنىن ايتتى. ول كەزدە كىشىرەيسە دە، كەۋدەمنىڭ ءبىراز فورماسى بولدى. ءبىراق، ەكى كۇننەن سوڭ ءتوسىم باياعى قالپىنا كەلدى. مەن تاعى دا دارىگەرگە بارىپ، فورمانىڭ جوعالىپ كەتكەنىن، سونشا اقشامنىڭ دالاعا كەتكەنىن ايتىپ، شاعىم جاسايمىن دەپ ەسكەرتتىم.
«مەنىڭ كىنام جوق، ۋزي- عا بار، باسقا جەرگە بارىپ دالەلدەسەڭ دە، اعزاڭدا گيالۋرون بار، فاكتى وسى. ساعان تاعى ءبىر پروتسەدۋرا جاساتۋ كەرەك، مەن ونىڭ ءبىر عانا پروتسەدۋرا ەمەس ەكەنىن ايتقانمىن»، - دەپ اقتالدى ول.
دارىگەردىڭ وتە دورەكى، كليەنتپەن ساناسپايتىنىن ايتقان كەيىپكەرىمىز ماماننىڭ گيالۋروندى بىرنەشە رەت ەگۋ كەرەك ەكەنىن ەسكەرتپەگىنىن ايتادى.
بويجەتكەن قۇنى ءبىر ميلليونعا جەتەتىن وتانى جاساتۋعا العان نەسيەسىن ءالى كۇنگە دەيىن جاۋىپ ءجۇر.
«سىزدەردىڭ رەداكسياعا حابارلاسىپ، وقيعامدى ايتۋ سەبەبىم مەن سياقتى تالاي قىز وسىنداي الاياق دارىگەرلەرگە الدانباسا ەكەن. ونسىزدا وعان بارعان تالاي قىز جىلاپ ءجۇر»، - دەيدى وتا جاساتىپ الدانعان قازاق قىزى.
NUR. KZ پورتالى انىقتاعانداي، كەيىپكەرىمىز بارعان ساودات جۋرايەۆا دارىگەرلەر وتباسىندا دۇنيەگە كەلگەن، دوتسەنت، باس دارىگەر، «كوسمەتولوگيا جانە دەرماتولوگيا ينستيتۋتىنىڭ» ديرەكتورى.
