استانانىڭ تۋريستىك سيمۆولىن كورسەتە الاتىن ادام تابىلماي جاتىر

استانا. قازاقپارات - استانانىڭ تۋريستىك سيمۆولىن كورسەتە الاتىن ەسكيز- يدەيالاردى انىقتايتىن رەسپۋبليكالىق كونكۋرستىڭ قازىلار القاسى قابىلدانعان وتىنىشتەردىڭ ءبىر دە بىرەۋى تالاپقا ساي ەمەس دەگەن قورىتىندىعا كەلدى.

 سوندىقتان، ءبىرىنشى كونكۋرس كۇشىن جويىپ، كونكۋرستىڭ ەكىنشى كەزەڭى باستالدى، دەپ حابارلايدى قازاقپارات.

جالپى، كونكۋرسقا ءوتىنىش 25 - قاڭتارعا دەيىن قابىلدانعان بولاتىن. قازاقستاننىڭ تۇپكىر- تۇپكىرىنەن 142 ادام ءوتىنىش بىلدىرگەن ەكەن. 26 - قاڭتار كۇنى كونكۋرستىڭ قازىلار القاسى كونۆەرتتەردى اشىپ، 13 ۇزدىك جۇمىستى تاڭداپ العان. الايدا، كەيىنىرەك، جۇمىستاردى باعالاپ، اشىق داۋىس جۇرگىزگىننەن كەيىن ولار سول 13 جۇمىستى دا جارامسىز دەپ تاپقان.

«كوميسسيا جەتى رەت وتىرىس وتكىزدى. كوميسسيا مۇشەلەرىنىڭ اراسىندا ساۋلەتشىلەر مەن ديزاينەرلەر، تاريحشىلار بار. كوميسسيا وتىنىشتەردى بىرنەشە رەت قاراپ شىقتى. بىرنەشە رەت باس قوسسا دا كوميسسيا ورتاق ءبىر شەشىمگە كەلە المادى. سوندىقتان، كونكۋرستىڭ ءبىرىنشى كەزەڭى جويىلدى. وسىلايشا، ەكىنشى كەزەڭىن جاريالاۋ تۋرالى شەشىمگە كەلدىك»، - دەيدى استانا قالالىق ىشكى ساياسات باسقارماسىنىڭ باسشىسى ەرلان قاناليموۆ.

 بۇگىننەن باستاپ، قازاقستاندىقتار ەندى 20 كۇن ىشىندە وسى كونكۋرسقا قاتىسا الادى. كونكۋرستىڭ جۇلدە قورى 3,5 ميلليون تەڭگە. جەڭىمپاز ادامعا 2 ميلليون، ەكىنشى ورىن العانعا 1 ميلليون، ءۇشىنشى ورىن العانعا 500 مىڭ تەڭگە سىياقى بەرىلەدى.

 اۆتور: كەنجەكەي توقتامۇرات قىزى