قىزىلوردالىق ونەرتاپقىش كولىكتى جانار- جاعارمايسىز جۇرگىزەتىن قوزعالتقىش ويلاپ تاپتى

استانا. قازاقپارات - قىزىلوردالىق ونەرتاپقىش ادامزات ءومىرىن جەڭىلدەتۋدىڭ تىڭ ءتاسىلىن ويلاپ تاپتى. دالىرەك ايتساق، «وزدىگىنەن اينالاتىن دۆيگاتەلدىڭ» جوباسىن جاساپ شىعارعان،

 دەپ حابارلايدى Baq.kz ءتىلشىسى.

ەرەكشە جوبانىڭ اۆتورى سەرىكباي نۇرعاليەۆ - قىزىلوردا قالاسىنىڭ قاراپايىم تۇرعىنى. ماماندىعى - اۆتومەحانيك. جەكە كاسىپپەن اينالىسادى.

2015 -جىلى شىلدە ايىندا ق ر يندۋستريا جانە جاڭا تەحنولوگيالار مينيسترلىگى مەن تەحنولوگيالىق دامۋ جونىندەگى ۇلتتىق اگەنتتىك بىرلەسە ۇيىمداستىرعان «NIF50K» يننوۆاتسيالىق بيزنەس- جوسپارلار رەسپۋبليكالىق كونكۋرسى وتكەن بولاتىن. سەرىكباي نۇرعاليەۆ سونىڭ جارتىلاي فينالىنا جەتىپ، ديپلوممەن ماراپاتتالدى. سوندا كوپتەگەن ازامات قىزىلوردالىق ونەرتاپقىشتىڭ جوباسىن قولداپ، قاتتى قىزىعۋشىلىق تانىتقان.

سەرىكبايدىڭ سوزىنشە، ونىڭ جوباسى قورشاعان ورتانى لاستامايدى، ەلىمىزدىڭ ەكولوگيالىق جاعدايىن جاقسارتىپ، ءبىرقالىپتاندىرۋعا ۇلكەن سەپتىگىن تيگىزەدى. كاسىپكەر ويلاپ تاپقان قۇرىلعىسىن پاتەنتتەپ ۇلگەرگەن ءارى جوباسى ماشينا جاساۋ سالاسىنا جاتادى.

يننوۆاتوردىڭ ايتۋىنشا، ويلاپ تاپقان تەڭدەسسىز قوزعالتقىشتىڭ «شيكىزاتى» - اتموسفەرالىق اۋا جانە ول ەنەرگيانى قالاعانىنشا وندىرە الادى. ياعني، كولىكتى جانار- جاعارمايسىز، اككۋمۋلياتورسىز جۇيتكىتەدى. ءتىپتى جەر بەتىندە دە، سۋ استىندا دا جۇمىس ىستەي بەرەدى. كونسترۋكتسيالىق قۇرىلىمىن كەز كەلگەن كولەمدە جاساۋعا بولادى. سوسىن ونى كەز كەلگەن كولەمدەگى بارلىق تەحنولوگياعا، گەنەراتورعا ارنايى قوندىرۋعا مۇمكىندىك بار. ءتىپتى، اسكەري، اۋىل شارۋاشىلىعى تەحنيكالارىن جاسايتىن زاۋىتتا دا قولدانىلا بەرەدى. سونداي- اق، كونسترۋكتسيالىق قۇرىلىسىن جاساۋ مەتالدارى اسا قىمبات ەمەس.

«وزدىگىنەن اينالاتىن دۆيگاتەلدىڭ» قۋاتى مول. ۆاكۋۋمدىق كامەراسىنا وزدىگىنەن قىسىم قۋاتىن ءبىر- اق رەت جينايدى جانە ۇدەتىپ وتىرادى. ال، اينالىس- قوزعالىس جانە وزدىگىنەن قىسىم جيناۋ، ۇدەۋ - «قۋاتى شەكسىز». دۆيگاتەلگە تەك اۋا بولسا بولدى، لاس پا، تازا ما، وعان قارامايدى. مىسالى، اۆتوكولىك بولسا، وعان باللون ارقىلى ىسكە قوسىلار الدىندا عانا قىسىمدى اۋا بەرىلەدى. ارى قاراي دۆيگاتەل اتموسفەرالىق اۋا ارقىلى وزدىگىنەن جۇمىس ىستەپ، ەنەرگيا جيناي بەرەدى. ەگەر قوزعالتقىشتى جەڭىل كولىككە ورناتساڭىز، جانارماي قۇيمايسىز، اقشاڭىزدى وعان شىعىندامايسىز»، - دەيدى سەرىكباي نۇرعاليەۆ.

ەندەشە ادامزات ءۇشىن ەڭ ءتيىمدى جوبانى ۇسىنىپ وتىرعان قازاق ينجەنەرىنىڭ قولىن بايلاعان نە نارسە؟

قازىرگى كۇنى ونەرتاپقىشتىڭ قولىندا جوبانىڭ سىزباسى عانا بار. تەوريا جۇزىندە ابدەن زەرتتەپ، زەردەلەگەن قۇراستىرۋشى ونى تاجىريبە جۇزىندە سىناپ كورگىسى كەلەدى. قالتالى ازاماتتار مەن مەملەكەت تاراپىنان قىزىعۋشىلىق تۋىنداپ، قارجى ماسەلەسى شەشىلسە، يننوۆاتور قاجەتتى ماماندارمەن دۆيگاتەلدىڭ كومپيۋتەرلىك مودەلىن جاساپ، دايىنداۋشى زاۋىتقا وتكىزۋدى كوزدەپ وتىر.

«اۋانىڭ قىسىمىمەن جۇرەتىن دۆيگاتەل مودەلىن جاساۋعا 15 ميلليون تەڭگە كەرەك. ءبىراق الدىمەن كومپيۋتەرلىك مودەلىن جاساۋ كەرەك. ول ءۇشىن 3-4 ميلليون تەڭگە قاراجات قاجەت»، - دەيدى وسى جوبانىڭ ۇيلەستىرۋشىسى، قىزىلوردا وبلىسى كاسىپكەرلەر قاۋىمداستىعىنىڭ ءتوراعاسى سۇلتان ءاشىم ۇلى.

س. نۇرعاليەۆ ءوز «ءونىمىن» العاش رەت 2007 -جىلى دۇنيەجۇزىلىك ۇلتتىق يننوۆاتسيالىق كونگرەسىندە تانىستىرعاننان بەرى قارجىلىق قولداۋعا ءزارۋ ەكەنىن ايتىپ كەلەدى. الايدا ءالى كۇنگە دەيىن ناتيجە جوق. ءبىراق دەمەۋشىلەر تابىلار دەپ ءۇمىت ەتەدى.

بىرەگەي جوبانى سەرىكباي «ەكسپو-2017» كورمەسىنە ۇسىنۋعا نيەتتى. ەگەر ونىڭ جاڭالىعى قولداۋ تاۋىپ، جۇزەگە اسسا، قىزىلوردا وبلىسى كەز كەلگەن كولىكتى وتىنسىز وتالدىراتىن قوزعالتقىشتىڭ وتانىنا اينالارى ءسوزسىز.

يبراش ءالي

Baq.kz