ەكسپو- عا شىنى قۇتىداعى تاماق پەن سۋسىندارمەن كىرۋگە تىيىم سالىنادى - قاۋىپسىزدىك قىزمەتى
دەپ حابارلايدى قازاقپارات ءتىلشىسى.
«مۇگەدەك ادامدار، جۇكتى جانە بالاسى بار ايەلدەر ءۇشىن ارنايى كىرەبەرىستەر بولادى. ءبىز ول جاعىنان دا ىڭعايلى جاعدايلار جاسايتىن بولامىز. ۇزىن- سونار كەزەكتەر بولمايدى دەپ ويلايمىز. سەبەبى ءبىز الەمدىك تاجىريبەنى جان- جاقتى زەردەلەپ، سونىڭ نەگىزىندە ءتيىستى شارالاردى قولعا الىپ وتىرمىز. وعان سايكەس، ءبىر ادامدى وتكىزۋگە 20-40 سەكۋند كەتۋى ءتيىس. ارينە، دەمالىس پەن مەيرام كۇندەرى كەزەكتەر بولۋى ابدەن مۇمكىن. دەگەنمەن، جۇمىس كۇندەرى ونداي قيىندىقتار بولمايدى. جالپى، كورمە اۋماعىندا شامامەن 20 مىڭ سان الۋان دابىل قاعۋ داتچيكتەرى مەن 2 مىڭنان استام بەينەباقىلاۋ كامەرالارى ورناتىلادى»، - دەيدى چاكەنوۆ.
ونىڭ ايتۋىنشا، بۇگىندە كورمە اۋماعىنا اكەلۋگە تىيىم سالىنعان زاتتاردىڭ تولىق ءتىزىمى بيلەتتەردى ساتۋ سايتىندا كورسەتىلگەن.
«ەندى، الدىمەن قارۋ- جاراق، سان الۋان زياندى، حيميالىق جانە راديواكتيۆتى زاتتاردى اكەلۋگە تىيىم سالىنعان. ال بالالارعا ارنالعان تاماق ونىمدەرىن اكەلۋ جاعىنان شەكتەۋلەر بولمايدى. الايدا شىنى قۇتىمەن ونداي ونىمدەردى كىرگىزۋگە بولمايدى. سوندىقتان پلاستيكالىق ىدىستاردى قولدانۋعا كەڭەس بەرەمىن»، - دەپ اتاپ كورسەتتى قاۋىپسىزدىك دەپارتامەنتىنىڭ باسشىسى. وسى ورايدا ول گادجەتتەر، تەمەكى مەن وتتىقتى اكەلۋگە تىيىم سالىنبايتىنىن جەتكىزدى.
ايتا كەتەيىك، بۇگىن ەكسپو حالىقارالىق كورمەسى اۋماعىندا ەسىل اۋداندىق ىشكى ىستەر باسقارماسىنىڭ پوليتسيا بولىمشەسى ءوز جۇمىسىن باستادى. ەكىقاباتتى عيماراتتا جەر استى سپورتى زالى مەن تير بار.
اۆتور: ارمان اسقاروۆ
