ەرالى توعجانوۆ ماڭعىستاۋ وبلىسىنىڭ اكىمى بولىپ تاعايىندالدى

استانا. قازاقپارات - بۇگىن ق ر پرەمەر- ءمينيسترى باقىتجان ساعىنتايەۆ پەن ق ر پرەزيدەنت اكىمشىلىگى باسشىسىنىڭ ءبىرىنشى ورىنباسارى مارات ءتاجين جۇمىس ساپارىمەن اقتاۋعا بارىپ، وبلىستىق ءماسليحاتتىڭ كەزەكتەن تىس سەسسياسىنا قاتىستى.

  بۇل تۋرالى ق ر ۇكىمەتىنىڭ باسپا ءسوز قىزمەتى حابارلايدى.

 وتىرىس بارىسىندا ق ر پرەمەر- ءمينيسترى باقىتجان ساعىنتايەۆ مەملەكەت باسشىسىنىڭ ءماسليحات دەپۋتاتتارىنا باعىتتالعان ماڭعىستاۋ وبلىسىنىڭ اكىمى قىزمەتىنە توعجانوۆ ەرالى لۇقپان ۇلىنىڭ كانديداتۋراسىن ۇسىنۋ تۋرالى حاتتى وقىدى. دەپۋتاتتار پرەزيدەنت ۇسىنعان كانديداتۋرانى ءبىراۋىزدان قولدادى. وسىعان دەيىن ەرالى لۇقپان ۇلى قازاقستان حالقى اسسامبلەياسى ءتوراعاسىنىڭ ورىنباسارى، قازاقستان حالقى اسسامبلەياسى حاتشىلىعىنىڭ مەڭگەرۋشىسى قىزمەتتەرىن اتقارعان.

ساياسات تانۋ عىلىمدارىنىڭ دوكتورى. توعجانوۆ ەرالى لۇقپان ۇلى 1963 -جىلى 13 - مامىردا باتىس قازاقستان وبلىسىندا دۇنيەگە كەلدى. جوعارى ءبىلىمدى: ە. ا. بوكەتوۆ اتىنداعى قاراعاندى مەملەكەتتىك ۋنيۆەرسيتەتىندە (1983-1988 ج ج.)، قۇقىق تانۋ. ق ر عىلىم اكادەمياسىنىڭ مەملەكەت جانە قۇقىق ينستيتۋتى (1991-1994ج ج. )، زاڭگەر. كەڭەس وداعىنىڭ اسكەر قاتارىندا قىزمەت ەتتى. 1991 -جىلدان 1998 -جىلعا دەيىن ە. ا. بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ مەملەكەت جانە قۇقىق تەورياسى مەن تاريحى كافەدراسىندا وقىتۋشى. 1994-1996 ج ج. ق ر عىلىم اكادەمياسىنىڭ مەملەكەت جانە قۇقىق ينستيتۋتىندا عىلىمي قىزمەتكەر. 1996 - جىلدان باستاپ قازاق گۋمانيتارلىق زاڭ ۋنيۆەرسيتەتىنىڭ مەملەكەتتىك قىزمەت جانە حالىقارالىق قۇقىق فاكۋلتەتىنىڭ اعا وقىتۋشىسى، دەكان ورىنباسارى قىزمەتىن اتقاردى. 1994 -جىلدان باستاپ اتالعان ۋنيۆەرسيتەتتىڭ حالىقارالىق قۇقىق فاكۋلتەتىنىڭ دەكانى بولدى. 1999 -جىلى فيليال دەكانى، 2001 -جىلى استانا قالاسىنىڭ قازاق گۋمانيتارلىق زاڭ ۋنيۆەرسيتەتىنىڭ قۇقىق جانە مەملەكەتتىك قىزمەت ينستيتۋتىنىڭ ديرەكتورى بولىپ تاعايىندالدى. 2001-2006 ج ج. قاراعاندى وبلىسى اكىمىنىڭ ورىنباسارى. 2006-2008 ج ج. قازاقستان رەسپۋبليكاسى ادىلەت مينيسترلىگى ءدىن ىستەر كوميتەتىنىڭ ءتوراعاسى بولىپ جۇمىس ىستەدى. 2008 -جىلدىڭ قاڭتارىندا قازاقستان رەسپۋبليكاسى پرەزيدەنتى وكىمىمەن قازاقستان رەسپۋبليكاسى پرەزيدەنت اكىمشىلىگىنىڭ قازاقستان حالقى اسسامبلەياسى حاتشىلىعىنىڭ مەڭگەرۋشىسى بولىپ تاعايىندالدى. مەملەكەتتىك ماراپاتتارى جانە قۇرمەتتى اتاقتارى بار. 2 دەڭگەيلى «دوستىق» وردەنى جانە «ەرەن ەڭبەگى ءۇشىن» مەدالىمەن ماراپاتتالعان.