جارىنان جىلى ءسوز ەستىمەگەن ايەل باسقانىڭ ءتاتتى سوزىنە تەز الدانادى

استانا. قازاقپارت - ايەل ادامعا ايەل بولىپ كۇن كەشۋدىڭ ءوزى ءبىر جاعىنان - باقىت، ءبىر جاعىنان - سالماقتى ءىس. «ايەلدىڭ قىرىق جانى بار» دەپ ءجيى ايتامىز. سول قىرىق جاننىڭ دا ءوز سۇراۋى بار. قىرىق جاننىڭ دا ءوز سالماعى بار.

ايەل بولمىسىنا ساي تۇرمىستىڭ قاندايىنا بولسا دا ءتوزۋ ءۇشىن كۇش كەرەك. ايەلدىڭ عۇمىرىن بويىنا ءسىڭىرىپ، ايەل اتىنا ساي بولۋ ءۇشىن دە ولارعا قىرىق جان كەرەك. ءوزىنىڭ قىرىق جانىمەن ەرىنىڭ جالعىز جانىنا قورعان بولۋ ءۇشىن ايەل ادامعا ەرىنەن ەڭ الدىمەن نە قاجەت؟

ءبىر اۋىز ءسوز بىرلىكتى كۇشەيتەدى

 ايەلدەر -  نازىك جاندى. كەيدە ەركەلەگەندى، جىلى ءسوز ەستىگەندى ۇناتادى. سونداي كەزدەردە شىدامدىلىق تانىتىپ، تۇسىنىستىكپەن قاراعان دۇرىس. ايەلدىڭ تابيعاتى ەرىنە ءوز پروبلەمالارىن ايتىپ، كومەك سۇراۋىنا كەدەرگى ەمەس، ايەل زاتى وقيعالاردان اسەرلەنگىش، سىنشىل دا ءمىنشىل كەلەدى. بار نارسەنى سوزبەن رەتتەپ، ورىندى جەردە ورىندى لەبىزدىڭ ايتىلۋىنا اسا ءمان بەرەدى. ءبىر- ەكى اۋىز جىلى ءسوزدىڭ ءوزى ايەلدىڭ كوڭىلىن كوتەرىپ، سىيلاعان بولماشى عانا سىيلىق ونى بالاشا قۋانتۋى مۇمكىن. كەيدە سىيلىقتىڭ باعاسى مەن كولەمىنىڭ وزىنە ساي بولۋىن تالاپ ەتۋى دە عاجاپ ەمەس، سەبەبى، ايەل ءۇشىن ەرىنىڭ وعان قانشالىقتى كوڭىل ءبولىپ، باعالايتىندىعى ماڭىزدى. سول سياقتى ورىندى ايتىلعان ءبىر اۋىز ءسوز دە كەز- كەلگەن وتباسىنداعى قارىم- قاتىناستى نىعايتىپ، بىرلىكتى كۇشەيتەدى.

ايەلدىڭ جۇرەگى اۋىر سوزگە لايىقتالماعان

ايەلدىڭ اعزاسى اۋىر جۇمىسقا لايىقتالماعانى سياقتى ونىڭ نازىك جۇرەگى دە اۋىر سوزدەردىڭ مەكەنى ەمەس. جاقسى انا بولۋ - ايەل باقىتىنىڭ كىلتى. نازىكتىك دەگەنىمىز - الەمدى قۇتقاراتىن سۇلۋلىق. ايەل زاتىنىڭ ەڭ باستى ەكى ەرەكشەلىگى - سۇلۋلىعى مەن نازىكتىگىن ساقتاۋ جانە وتباسىنىڭ قامقور اناسى بولۋ. ايەل ادام قولىنان كەلگەنىن ىستەسىن. ءبىراق ونى جۇمىس دەپ قابىلداماسىن. جۇمىستى تەك ەركەكتەرگە قالدىرسىن. ايەلدەردىڭ ساناسى مەن اعزاسى باسقاعا ارنالعان. اسحانا. قازان كوتەرە ءبىلۋدىڭ ءوزى ونەر. ءبىراق مۇنى دا تەرەڭ ءتۇسىنۋ كەرەك. ەركەك تەك ۇر دا جىق مىنەزگە لايىق دەگىمىز كەلمەيدى. ويى تاياز ادام عانا سولاي قابىلدايدى. ايەلدىڭ قىزمەتى - نازىكتىككە يە بولۋ.

ەگەر جىلى- جىلى سويلەسەڭىز...

 «جىلى- جىلى سويلەسەڭ، جىلان ىننەن شىعادى...» ەل مەن ەردىڭ، ادام مەن ادام اراسىندا التىن دانەكەر بولاتىن جىلى ءسوزدىڭ پايداسىن حالقىمىز جاقسى بىلگەن. جىلى ءسوزدىڭ قۇدىرەتىنە ءسىز ءوز ومىرىڭىزدە تالاي كوز جەتكىزگەن بولارسىز، ءبىراق ادامداردىڭ كوبى وعان ونشا كوڭىل اۋدارمايدى. جىلى ءسوز -  جان شۋاعى. ايەل ادامعا قوشەمەت سوزدەر ايتساڭىز، دارەجەڭىز ءتۇسىپ قالمايدى، كەرىسىنشە بۇل ەرلى- زايىپتىنىڭ اراسىنداعى سەزىمدى نىعايتا تۇسەدى. بۇل سوزدەردى ءسىز كەز- كەلگەن ۋاقىتتا: كۇندىز دە، كەشكە دە، تۇندە دە جانە كەز- كەلگەن جاعدايدا ايتا الاسىز.

كۇيەۋىنەن جىلى ءسوز ەستىمەگەن ايەل باسقانىڭ ءتاتتى سوزىنە تەز الدانادى

 ءبىزدىڭ كومپيۋتەرلىك زاماندا قارىم- قاتىناس وڭاي بولىپ كورىنگەنمەن، جىلى ءسوز ءبىز ءبىر كەزدەرى وقىعان كىتاپتاعى كەيىپكەرلەردىڭ جانىنداي نازىك بولىپ قالا بەرەدى. ولار ءدال بۇرىنعىداي گۇلدەردى، توسىن سىيلاردى جانە وزدەرىنە قاراتىپ ايتىلعان قوشەمەت سوزدەردى (كومپليمەنت) جاقسى كورەدى. ءسىز جارىڭىزعا جاقسى سوزدەردى ءجيى ايتىپ ۇيرەنىڭىز. سەبەبى، كۇيەۋىنەن جىلى ءسوز ەستىمەگەن ايەل باسقانىڭ ءتاتتى سوزىنە تەز الدانادى. ونىڭ سىرت بەينەسى ءاردايىم كەرەمەت، ونىڭ سۇلۋلىعى ەشقاشان قايتالانبايدى دەگەن ماندەگى قوشەمەت سوزدەر ايەل ادامنىڭ ەزۋىن ەرىكسىز جىميتادى دا، اينالاسىن نۇرعا بولەيدى. سۇيىكتىڭىزدىڭ بويىنداعى وزگەرىستەردى نازاردان تىس قالدىرماڭىز. ونىڭ ادەمى كيىم ۇلگىسىن، ءسىز ءۇشىن ادەمىلەنگەنىن بايقاعانىڭىزدى جانە وعان وتە جاراسىمدى ەكەنىن ايتىڭىز. تەك اسىرا سىلتەپ، جاساندىلىققا بوي الدىرۋدان اۋلاق بولىڭىز. ايەل بالاسى وتە سەزىمتال. شىن كوڭىلمەن ايتىلماعان ءسوزدى ولار بىردەن بايقاپ قويادى.

ايەل ءوزىنىڭ ەڭبەگىن باعالاعاندى ۇناتادى

ايەلدەر وزدەرىنىڭ ادەتتەرى مەن قىزىعۋشىلىقتارىنا ەرىنىڭ كوڭىل بولگەنىن ۇناتادى. ەگەر ءسىز ونىڭ قانداي دا ءبىر تاعامدى جاقسى جاسايتىنىن ايتار بولساڭىز، توبەسى كوككە جەتكەندەي بولادى. ءوزى سونداي نازىك بولعانىمەن، بارىنە ۇلگەرەتىنىن، ءۇيدىڭ جۇمىسى مەن قىزمەتىن قاتار الىپ جۇرە الاتىنىن العا تارتىڭىز. ايەل ادامدار ءوزىنىڭ ەڭبەگىن بايقاعاندى جانە باعالاعاندى قاتتى ۇناتادى. سول سەبەپتى ايەلدىڭ ەڭبەگىن باعالاپ، ماقتاپ قويۋدى ۇمىتپاڭىز. ول ايەلگە وزىنە دەگەن سەنىمدىلىك پەن كۇش- جىگەر بەرەدى.

ول - ءالسىز جاراتىلىس، گۇلمەن كومكەرىڭىز!

جانى اياۋلى ايەلدەردىڭ ءوزى گۇلدى جاقسى كورەدى. بىرنەشە راۋشان گۇلىنەن جاسالعان ءبىر قۇشاق گۇل كىم- كىمدى دە قۋانتادى. ءبىراق، ىقىلاسپەن، جۇرەكپەن بەرىلگەن ءبىر شوق گۇلمەن دە وعان قۋانىش سىيلاۋعا بولادى. ءتىپتى، جەردە وسكەن ۇساق گۇلدەردى الىپ، القا، جۇزىك، بىلەزىك نەمەسە ءتاج جاساپ، «مەنىڭ حانشايىمىما» دەپ ۇسىنىڭىزشى، ودان باقىتتى ايەل بولمايدى.

ونى ادەمى ەسىممەن شاقىرىڭىز!

پايعامبارىمىز (وعان اللانىڭ سالەمى مەن يگىلىگى بولسىن) ايشا انامىزدى (وعان اللا رازى بولسىن) ماحابباتپەن « ءحۋمايرا» دەپ ەركەلەتىپ شاقىراتىن. جانە ادامدارعا: «دىندەرىڭنىڭ جارتىسىن وسى حۋمايرادان ۇيرەنىڭدەر» ، - دەپ ايتاتىن. ءسىز دە جارىڭىزدى جاقسى، ءتاتتى ءبىر ەسىممەن شاقىرىڭىز. ءاربىر ۇساق نارسەدە ءسىز ءوزىڭىزدىڭ جۇبايىڭىزعا سۇيىسپەنشىلىگىڭىزدى ءبىلدىرۋىڭىز كەرەك. ماحابباتتىڭ جالىنىن ۇستاپ تۇرۋ ءۇشىن جارىڭىزعا دەگەن سەزىمىڭىزدى جاسىرماڭىز. كۇيەۋى مەن ايەلى ءاردايىم ءبىر- بىرىنە جاقسى، جىلى سوزدەر مەن ماقتاۋلار ايتىپ تۇرۋ كەرەك. كۇيەۋى ايەلىنە ءوزىنىڭ عاشىقتىعى مەن ىنتىقتىعىن كورسەتۋى قاجەت. وسىنداي ءوزارا قارىم- قاتىناس بار بولسا، نەكە بيىكتەرگە كوتەرىلەدى.

P/S: اقشا تاپساڭىز دا، وتباسىڭىز ءۇشىن تاماق پىسىرسەڭىز دە، باستى ماقسات - اللانىڭ رازىلىعىن الۋ. ايەلىڭىزگە گۇل سىيلاساڭىز دا - اللانىڭ رازىلىعىن عانا كوزدەيتىنىڭىزدى جادىڭىزدا ۇستاڭىز. پايعامبارىمىزعا (وعان اللانىڭ يگىلىگى مەن سالەمى بولسىن) ەلىكتەڭىز، سوندا ءسىزدىڭ دە ايەلىڭىز ايشا انامىزعا (وعان اللا رازى بولسىن) ەلىكتەيدى. اللا تاعالا سىزدەرگە باقىتتى دا، بەرەكەلى وتباسى بولۋدى ءناسىپ ەتسىن، - دەپ جازادى اسىل ارنا.